Жамбыл облысында ҚР Мемлекеттік рәміздерінің 30 жылдығына орай «Менің Қазақстаным!» атты форум өтті. Әуелете шырқалған Әнұранмен ашылған шараға облыс әкімі Нұржан Нұржігітов қатысып, жиналғандарды мерекемен құттықтады.
– Бүгінде Мемлекеттік Ту, Елтаңба, Әнұран – әр қазақ мақтан тұтатын, халқымыздың береке-бірлігін арттыра түсетін бойтұмарымыз.
Рәміздерді қастерлеу – біздің ортақ парызымыз. Мемлекеттік рәміздер – кез келген мемлекеттің егемендігі мен тұтастығының бейнесі. Осынау нышандарымыз төрімізден түспей, туымыздың тұғыры биік болсын!
Мемлекеттік Тудың авторы Шәкен Ниязбеков Жамбыл өңірінің тумасы және ел мақтанышы. Өткен жылы тарихи тұлғаның есімі өзінің кіндік қаны тамған Жамбыл ауданындағы Бесжылдық ауылына беріліп, ауыл маңында Мемлекеттік Ту-Тұғыры көтерілді. Бұл Мемлекеттік рәміз мен тұлғаға көрсетілген құрмет!
Баршаңызды бүгінгі мерекемен құттықтай отыра, Еліміздің амандығын, жеріміздің тұтастығын тілеймін! Аспан түсті Туымыз, асқақ Әнұранымыз, айбынды Елтаңбамыз бар еліміз мәңгі жасай берсін,-деді облыс әкімі.
Аймақ басшысы бірқатар патриот азаматтарды марапаттады.
Бұдан соң Кенен Әзірбаев атындағы Жамбыл облыстық филармониясының концерттік бағдарламасы көпшілік назарына ұсынылды.
Айта кетейік, бұл күні Мемлекеттік рәміздер мерекесіне арналған арнайы авто-шеру ұйымдастырылды.
