Көпшіліктің талабына орай Қазақстанда уақыт қайта ауысуы мүмкін. Себебі E-Petition.kz сайтында сағатты қайта ауыстыруды талап еткен азаматтардың саны қажетті мөлшерден асып, петицияны ҚР сауда және интеграция министрлігі қабылдады, деп хабарлайды Tarazy ақпарат.
Қазақстан аумағында осы жылдың 1 наурызында бірыңғай сағат белдеуі ресми түрде енгізілген. Алайда соңғы уақытта тұрғындар тарапынан наразылық жиі айтылуда. Себебі бүкіл ел аумағына 1 сағаттық белдеуде болу қолайсыздық тудырған. Осыған орай, E-Petition.kz сайтында қол жинау басталды. Қажетті 50 мың қолдан асқан соң Үкімет халық талабына құлақ асуы тиіс.
ҚР сауда және интеграция министрлігі петицияны қабылдап, қарастыруды бастағанын мәлімдеді. Арнайы жұмыс тобы құрылатынын, оның құрамына арнайы мамандар, үкіметтік емес ұйым мүшелері, мүдделі топтардың өкілдері кіретінін жеткізді. Заң нормасына сәйкес петицияны қарау мерзімі 40 жұмыс күні.