Мемлекеттік-жекеменшік әріптестік экономиканың қай салаларында белсенді енгізілуде және оның дамуы жолында қандай кедергілер туындауда? Бұл туралы облыс әкімі Бердібек Сапарбаевтың төрағалығымен өткен селектрлік кеңесте талқыланды.
Басқосуға өңір басшысы бейнеконференция режимінде қатысып отырды.
Өткен жылы мемлекеттік-жекеменшік әріптестік шеңберінде кезең-кезеңімен жүзеге асырылуы тиіс 238 жобаның бірыңғай базасы құрылған болатын.
Айта кетейік, МЖӘ тетіктері денсаулық сақтау, білім беру, спорт, туризм, тұрғын үй-коммуналдық шаруашылық салаларында инфрақұрылымды дамытуға мүмкіндік беруде. Тиісінше, халыққа көрсетілетін қызметтердің сапасы да жақсара түсуде. Мәселен, осы әдіс арқылы №1 қалалық ауруханасына ангиограф, ал Шу аудандық ауруханасына компьютерлік томограф алынған.
Бизнес пен мемлекет арасындағы ынтымақтастықтың арқасында балабақшалар санын көбейту мәселесі де тиімді шешілуде. МЖӘ қағидатына сәйкес, мектепке дейінгі білім берудің мемлекеттік тапсырысына жеке меншік балабақшалар да қарастырылады. Биыл төрт балабақша мемлекеттік білім беру тапсырысын орындамақ.
Білім беру саласында мектеп асханаларын жаңғырту мақсатында оларды сенімгерлік басқаруға беру туралы 6 шартқа қол қою жоспарлануда. Дегенмен, өткен жылы жоспарланған 39 жобаның 15-і іске асырылмаған.
— Меркі, Шу аудандары мен Тараз қаласындағы мектеп асханалары сенімгерлік басқаруға берілмеді. Тиісті әкімдер мен денсаулық сақтау басқармасына жаңа оқу жылы басталғанға дейін бұл мәселені шешуді тапсырамын. Жөндеу жұмыстары балалардың тыныш білім алуына кедергі келтірмеу керек, — деді Бердібек Сапарбаев.
Облыс орталығы көшелерін энергия үнемдейтін жарықдиодты шамдармен жабдықтау мақсатында энергетика саласында келісімге қол жеткізілген. Энергетика және тұрғын үй-коммуналдық шаруашылық басқармасы басшысының орынбасары Құдайберген Қорғанбаевтың айтуынша, бұл бағыттағы жұмыстар жыл соңына дейін аяқталмақ.
Облыс әкімі мердігер ұйымның сылбыр жұмысын сынға алып, тиісті басқармаға жұмыс барысын жүйелі түрде қадағалап отыру керектігін ескертті.
Кәсіпкерлер қазіргі уақытта қаралып жатқан қоғамдық жол қауіпсіздігі саласындағы жобаны қолдап отыр. Аймақ басшысы бұл процесті жеделдетуді тапсырды.
Бүгінде МЖӘ аясында қоғамдық көліктерде электронды билеттендіруді енгізу және аялдамаларды жаңғырту жұмыстары жүргізілуде.
Бердібек Сапарбаев тиісті жұмыстарды кестеден кешіктірмеу керектігін еске салды.
МЖӘ аясында жұмыс жүргізу – инвесторларды тартуды көздейді. Бірақ бұл үшін нақты шаралар қабылданбаған. Мысалы, Жамбыл облысының инвесторларға қызмет көрсету, жобалық басқару және цифрландыру орталығының директоры Дамир Егізбаевтың айтуынша, МЖӘ жобалары бойынша оларға тек жеті кәсіпкер ғана жүгінгенімен, бірақ ол жүзеге асырылмаған күйінде қалған.
— Орталық қызметінің нәтижесі көрінбейді. Қызметкерлердің штаттық саны ауқымды болғанымен, оларды тиімді пайдалана алмай отырсыздар. Орталықта «Тараз» ӘКК-мен де, өңірлік кәсіпкерлер палатасымен де, мемлекеттік органдармен де әріптестік байланыс оң жолға қойылмаған, — деді облыс әкімі.
Ол инвесторларға қызмет көрсету, жобалық басқару және цифрландыру орталығының қызметін зерделеуді және оның құрылымын қайта қарауды тапсырды.
«Тараз» ӘКК» ҰК» АҚ Басқарма төрағасы Олжас Қаржауов мемлекеттік-жеке меншік әріптестік орталығын ашуды ұсынды. Басқа қалалардың мысалға алған ол орталық инвестициялық жобаларды зерттеу, оқыту және кеңес беру, сараптау және іске асыруды бағалау бойынша қызметтер көрсететіндігін алға тартты. Қазір бұл қызметтерді алу үшін басқа қалаларға баруға тура келеді.
Облыс әкімі бұл жобаны қолдап, барлық қажеттіліктерді жан-жақты зерделеуді тапсырды.
— Кәсіпкерлердің МЖӘ аясында жұмыс істеуге ұмтылыстарын арттыру үшін барлық жағдай жасалуы тиіс. Бұл механизм бюджетке түсетін жүктемені азайтып қана қоймай, бизнесті дамытуға да өзінің оң ықпалын тигізбек. Атап айтсақ, экономиканы дамыту, қосымша жұмыс орындарын құруға да мүмкіндік бермек, — деп қорытындылады Бердібек Сапарбаев.