Маңғыстау облысының бұрынғы әкімі Нұрлан Ноғаев Қаңтар оқиғасы кезіндегі өзінің рөлі мен сол сәтте бастан кешкен күйі туралы алғаш рет кеңінен тоқталды, деп хабарлайды Tarazy.kz
Журналист Ботагөз Омароваға берген сұхбатында ол өзіне қатысты айып сезінбейтінін жеткізді. Оның айтуынша, сол уақытта өңір басшысы ретінде де, қарапайым азамат ретінде де қолдан келгеннің бәрін жасаған.
Оқиға күндері қорқыныш болды ма деген сұраққа Ноғаев жасырмай жауап берді:
«Иә, қорқынышты болды», — деді ол.
Оның айтуынша, ең ауыр сезім — халықтың сенімін ақтап, өңірде қайғылы жағдайға жол бермеу мүмкіндігіне деген алаңдаушылық болған.
«Құдай сақтасын, бір нәрсе болып қалса — өзімді кінәлі сезінер едім. Менің әлсіздігімнен ауыр жағдай орын алуы мүмкін еді», — деді ол.
Ноғаевтың пікірінше, бүгінде Қаңтар туралы батыл сөйлеп жүргендердің көбі сол кезде дәл сондай жағдайда отырса, бұлай сенімді болмас еді.
Айта кетейік, қазіргі уақытта Нұрлан Ноғаев — Қазақстанның Түрікменстандағы Төтенше және Өкілетті елшісі. Бір апта бұрын ол Астанаға Түрікменстан президентінің ресми сапары аясында ел астанасына келген болатын.
