Қарағанды облысында 16 жастағы бозбала 14 жастағы жасөспірімді өртеп жіберген, деп хабарлайды Tarazy.kz turkystan.kz-ке сілтеме жасап.
Оқиға 2024 жылы 17 қыркүйекте Ақтоғай ауданына қарасты Шашубай ауылында болған.
Басылым дерегінше, 16 жастағы жасөспірім 14 жастағы баланы әдейі өртеген. Ол жанып тұрған сіріңкені оған қарай лақтырған. Жәбірленушінің бензинге малынған шалбары бірден тұтанып кеткен. Жәбірленуші киімін шешуге тырысқанымен, матасы еріп, терісіне жабысып қалған, соның салдарынан ауыр күйік алған.
Тергеу дерегінше, 16 жастағы жасөспірім күйік алған балаға көмек көрсетпеген және медициналық қызмет шақырмаған. Ол үйінен өзінің ескі шалбарын алып келіп, жәбірленушіден сол шалбарды киюді талап еткен және болған жағдайды ешкімге айтпауын талап еткен. Жәбірленуші сол шалбарды киіп, үйіне оралғаннан кейін анасы жедел жәрдем шақырған.
Қарағанды облысының ювеналды сотының судьясы 16 жастағы жасөспірімді ҚР Қылмыстық кодексінің 107-бабы 2-бөлігі – «Кәмелетке толмағанға қатысты әдейі орташа ауырлықтағы зиян келтіру» бойынша кінәлі деп таныды.
Сот сотталушының кәмелетке толмағанын, сотталмағанын ескере отырып, сот 1 жыл 6 ай мерзімге бас бостандығын шектеу және бір жыл пробациялық бақылау белгілеу туралы үкім шығарды.