Абай облысының әкімі Берік Уәли Қытай инвесторларына қарсы бағытталған әрекеттер заңсыз екенін айтты, деп хабарлайды Tarazy.kz
Журналист Жомарт Жұмагелдин таратқан видеода әкім Қытайдан “қорқу” немесе оларды қоғамдық жау ретінде көрсету ел мүддесіне қайшы әрекет екенін атап өтеді.
“Қытайдан қорқатын болсақ, онда жерді тастап Айға немесе Марсқа көшіп кетейік. Қытай азаматтарына “неге қазақша сөйлемейсің” деп тиісу — заңсыз. Ертең ондай адамдар сотталады. Халықты шатастырып, қытайларға қарсы қоюға болмайды. Керісінше, сіздер сол қытайларға көмектесулеріңіз керек. Мысалы, оларды ұрып-соғып, кеше TikTok-та видеоға түскен екі адам қамауға алынды”, — дейді ол.
Әкім шетелдік компаниялардың өңірге келуі өндірістік жобалардың іске асуына жол ашатынын жеткізді.
“Бүкіл әлем Қытайдың инвестициясына зәру, сол үшін таласып жатыр. Біз көрші тұрған Қытайдан инвестиция тартпасақ, ақша іздеп енді Италияға барамыз ба?! Сондықтан қытайлық компаниялар келіп жатса, олар босқа келіп отырған жоқ. Олар біздің жолымызды салайын деп жатыр. Егер олардың талаптарына сай жұмыс істей алсақ, жергілікті мамандарды неге тартпасқа? Әрине, тартамыз. Бірақ негізгі техникалық мамандар — қытайлықтар, ал дипломы жоқ жергілікті азаматтар қара жұмысқа алынуы мүмкін. Егер халықтың білімі болса, оларды да негізгі жұмысқа қабылдаймыз”, — деп қосты ол.
Сонымен қатар Берік Уәли теміржол құрылысы жобасына қатысты пікір білдіріп, бірнеше жыл бойы жүзеге аспаған жобаны Қытай тарапымен іске асыру мүмкіндігі пайда болғанын атап өтті.
“Қытайда ақша бар. Біз бұл теміржолды талай жыл саламыз дедік, бірақ ешкім кіріспеді. Енді соны қытайларға салдырмақпыз. Қайта Мемлекет басшысы мен Си Цзиньпинге рақмет, екі ел арасындағы барыс-келіс үшін визасыз режим енгізілді”, — деді ол.
