Сәтбаев университетінде идеяны өнімге айналдыратын жаңа инженерлік орталық ашылды

Сәтбаев университетінде инженерлік әзірлемелерді цифрлық модельден бастап дайын өнеркәсіптік өнімге дейін жеткізуге мүмкіндік беретін Mechanical Prototyping & Pilot Production орталығы ашылды, деп хабарлайды Tarazy.kz

Жаңа орталық «Idea to Product» – «идеядан өнімге дейін» қағидаты бойынша жұмыс істейді. Мұнда жобалау, дайындау, прототип жасау және сынақтан өткізу кезеңдері бір өндірістік алаңға біріктірілген.

Орталықта инженерлік жоба CAD/CAM-модель мен конструкторлық құжаттамадан бастап прототипке, өнеркәсіптік үлгіге және шағын сериялы өндіріске дейін жеткізіледі. Бір мезетте оқу-өндірістік алаңдарда 100 адамға дейін жұмыс істей алады.

Жоба әсіресе студенттер мен жас ғалымдардың практикалық дағдыларын дамытуға бағытталған. Олар заманауи өндірістік жабдықтармен жұмыс істеп, нақты инженерлік міндеттерді шешуге қатысады.

«Кейде серіктестеріміз студенттердің бұрауышты жақыннан көрмегенін айтып жатады. Мұнда олар заманауи өндірістік жабдықтармен жұмыс істеудің практикалық тәжірибесін алып, машина жасау өнімдерін өз қолдарымен шығара бастайды», – деді Сәтбаев университеті Энергетика және машина жасау институтының директоры Қасым Елемесов.

Орталықтың өндірістік инфрақұрылымында металды лазермен кесу, ию, соғу, дәнекерлеу және құрастыруға арналған жабдықтар бар. Сонымен қатар зертханалық, ресурстық және климаттық сынақтар, созылу жүктемесіне төзімділікті тексеру және сапаны бақылау жүргізіледі.

Орталықтың алғашқы жобаларының бірі – теміржол машина жасау саласындағы LocoSystems KZ компаниясымен бірлескен жоба. Тараптар жылжымалы құрамға арналған тежегіш қалыптарын өндіру жобасын іске асырып жатыр. Оның мақсаты – маңызды теміржол компоненттерінің импортын отандық өніммен алмастыру және Қазақстандағы машина жасау құзыреттерін дамыту.

«Ғылымды, білімді, бизнесті және өндірісті бір жерде тоғыстыруға тырыстық. Осы арқылы жас ғалымдарға станоктың жанында тұрып, өз идеяларын жүзеге асыруға мүмкіндік бергіміз келеді», – деді LocoSystems KZ басшысы, Сәтбаев университетінің түлегі Мақсат Қанатбаев.

Осылайша, жаңа орталық тек оқу алаңы емес, ғылыми әзірлемелерді нақты өндіріске енгізуге мүмкіндік беретін инженерлік базаға айналмақ. Мұнда прототиптер мен тәжірибелік үлгілер жасалып, сынақтан өткізіледі, инженерлік тапсырыстар орындалып, өнімнің шағын серияларын шығаруға мүмкіндік бар.

Жоба инженерлерді даярлау, ғылыми әзірлемелерді дамыту және оларды өндіріске енгізу үдерістерін бір арнаға тоғыстыруға бағытталған.