Қарағанды облысының дене шынықтыру және спорт басқармасының басшысы Серік Сәпиев пен оның орынбасары Дәурен Есімханов өз еркімен атқарып отырған қызметтерінен босатылды, деп хабарлайды Tarazy.kz
Ведомство мәліметінше, екі лауазымды тұлғаның қызметтен кетуі басқармада орын алған даулы оқиғалардан кейін қабылданған. Бұған дейін Серік Сәпиевтің соққыға жығылғаны, ал оның орынбасары Дәурен Есімхановтың тергеуге алынғаны хабарланған болатын. Кейін бұл оқиғаға қатысты видео әлеуметтік желілерде тарап, Серік Сәпиев ресми мәлімдеме жасаған еді.
Аталған жағдайға байланысты Қарағанды облысының дене шынықтыру және спорт басқармасында аудит жүргізілетіні белгілі болды.
Сонымен қатар, Туризм және спорт министрлігінің мәліметінше, Серік Сәпиев туризм және спорт министрінің штаттан тыс кеңесшісі – жазғы ХХ Азия ойындарына дайындық штабының спорт бойынша үйлестірушісі болып тағайындалды. Бұл шешім былтыр күшіне енген «Дене шынықтыру және спорт туралы» заңның жаңа редакциясында көзделген ротация қағидаттарына сәйкес қабылданған.
Еске салайық, Серік Сәпиев – бокстан Лондон Олимпиадасының чемпионы, 2010 жылы Гуанчжоуда өткен Азия ойындарының жеңімпазы. Ол бұған дейін ҚР Парламенті Мәжілісінің депутаты, Мәдениет және спорт министрлігінің Спорт және дене шынықтыру істері комитетінің төрағасы, сондай-ақ өңірлік басқарма басшысы қызметтерін атқарған.
Қазіргі уақытта Серік Сәпиев Қазақстан Республикасының Ұлттық сурдлимпиадалық комитетінің президенті болып табылады. Азия ойындарына дайындық штабының құрамына министрлік өкілдері, ұлттық спорт федерацияларының басшылары мен спорт саласының ардагерлері енеді.