Жамбыл облысында көктемгі дала жұмыстары қызу жүргізілуде. Ағымдағы жылы өңіріміздегі ауыл шаруашылығы дақылдарының егіс алқаптарының көлемін 687,1 мың гектардан 710,0 мың гектарға жеткізу көзделген, — деп хабарлайды Tarazy.kz тілшісі Жамбыл облысы әкімдігінің баспасөз қызметіне сілтеме жасап.
Бүгінге дейін жергілікті диқандар жерді жыртып, оның басым бөлігін өңдеп, дәнді дақылдарды себу шараларын белсенді атқаруда. Атап айтар болсақ, ағымдағы жылдың наурыз айының соңындағы аудандардың мәліметі бойынша 93277 гектарда көктемгі жер жырту жұмыстары атқарылып, 99,2 пайызды, 292035 гектар жер өңделіп, 71,6 пайызды, жаздық масақты дәнді дақылдар 168879 гектар алқапқа егіліп, 81,1 пайызды құрап отыр.
Оның ішінде дәнді және дәнді бұршақты дақылдар 365,3 мың гектар, майлы дақылдар 64,2 мың гектар, қант қызылшасы 7,2 мың гектар, картоп 10,5 мың гектар, көкөніс-бақша дақылдары 51,5 мың гектар, мал азығы дақылдары 211,3 мың гектарды құрайды деп күтіліуде. Ауыл шаруашылығы тауар өндірушілерін тыңайтқышпен қамтамасыз ету мақсатында облыстық бюджеттен 1 миллиард теңге қарастырылып отыр. Бұл қаражатқа 2 мың тонна минералды тыңайтқыш алынбақ. Өткен айда 50,0 миллион теңге бөлініп, толық игерілген.
Айта кету керек, көктемгі егіс-дала науқанына ауыл шаруашылығы техникаларының дайындық жұмыстары барлық аудандарда жоспарға сәйкес жүргізілуде.
Облыстық ауылшаруашылығы басқармасының мәліметі бойынша өңірімізде барлығы 8 419 ауыл шаруашылығы техникасы тіркелген. Бүгінде соқалар, қопсытқыштар, дән сепкіштер, тұқым дәрілегіш техникалардың барлығы көктемгі дала жұмыстарына толығымен дайын.
Ол ғана емес, көктемгі дала жұмыстарына ҚР Үкіметі тарапынан облысқа 18,3 мың тонна кепілдендірілген дизель отыны бөлінген десек, қазіргі таңда операторлар белгіленіп мұнай зауыттарына қаражат аударылып дизель отының жеткізу жұмыстары жүргізілуде.
