Алматыдағы метро жолаушылары енді жолақыны арнайы сканерге қарап, ешқандай картасыз, смартфонсыз, тек бет-әлпетті көрсету арқылы төлей алады, деп хабарлайды Tarazy ақпарат.
Бұл туралы Almaty_joly телеграм арнасы жазды. Ол үшін бар болғаны метроға кіргенде “Face Pay арқылы төлем” деген турникетке жақындап, камераға қарау қажет. Жолақы Halyk қосымшасына тіркелген картадан автоматты түрде алынады. Бірақ қолданушы қосымшаның төлемдер деген бөліміне картаны тіркеп қоюы керек.
«Face Pay — бұл заманауи ең қолайлы және ең қауіпсіз төлем жүйесі. Оған карта немесе смартфон қажет емес. Face Pay жүйесі бет-әлпетті дәл танитын жасанды интелекттің көмегімен жұмыс істейді. Ал төлем бірнеше секундта жүзеге асады. Бұл жүйе метрода жолаушы көп кезде, асыққан кезде өте қолайлы. Жаңа жүйемен қатар бұрынғы төлем түрі де жүре береді” дейді Алматының цифрландыру басқармасының басшысы Олжас Жаңабек.
Бұған дейін Face Pay жүйесі метроның тек екі бекетінде тест режимінде жұмыс істеген. Ал қазір барлық бекетте іске қосылды. Алматы метросы бір тәулікте 100 мың жолаушыға дейін тасымалдайды. Жыл басынан бері 11 млн. адам метроны қолданған.