Жуырда Парламент қабырғасында депутаттар ұлттық ойын тоғызқұмалақ атауын «тоғызат» деп өзгертуді ұсынған еді. Ал бүгін бір топ қоғам белсенділері «Қазақстан барысы» атауын өзгертуді ұсынды, деп хабарлайды Tarazy ақпарат агенттігі.
«Ұлы қазақ» деп аталатын қоғамдық бірлестік Алматыда жиын өткізді. Өткен жылы ұйымды заңды түрде Әлемдік «Ұлы қазақ» бірлестігі деп тіркеуден өткізген белгілі кәсіпкер Құсман Шалабаев еді. Құсман Кәрімұлы Алматы қалалық Қазақ тілі қоғамына жетекшілік етеді. 2023 жылы АҚШ-қа бір топ азаматпен барып, Әлемдік «Ұлы қазақ» бірлестігін таныстырып, тұсауын кесіп, сол ұйымның басшысы атанып қайтқан. Сол бірлестіктің ұйымдастыруымен Алматыда жиын өтті. Басқосуға қонақ ретінде белгілі тарихшылар, түркітанушылар мен алаштанушылар, этнографтар мен өнер адамдары және журналистер қатысты.
Жиында «Ұлы қазақ» партиоттық актісі таныстырылды. Ол құжатты әзірлегендердің бірі — бірлестік президентінің кеңесшісі Айдын Рысбекұлы. Оны көпшілікке таныстырған да сол азамат. «Қазақстан барысы» атауын өзгертуді де ұсынған — Айдын Рысбекұлы. Жоба атауын «Қазақ бөрісі» деп өзгерту керек, оны біз мемлекеттік деңгейде көтереміз дейді өзін алаштанушы деп таныстырған белсенді.
«Өзіңіз қараңыз, 2011 жылдан бері өтіп келе жатқан жарыстарда балуандар барыс емес қасқыр терісін жамылып шығады. Ал барыстың терісі қайда десек, ол Қызыл кітапқа енген деп жауап береді. Ендеше қиыспайтын нәрсе бар мұнда. Қазақ көкбөрі ұрпағымыз, қасқыр мінезді дейміз. Ендеше бұл спорттық шараның атауын «Қазақ бөрісі» деп атайық. Себебі қазір барыс деп жүргендері ілбіс қой. Мұны біздің бірлестік атынан мемлекеттік органдарға жолдаймыз», — дейді Айдын Рысбекұлы.
Жиынды Мамай Ахет жүргізіп отырды. Дөңгелек үстел басында журналист Марат Тоқашбаев, атиллатанушы Еренғайып Омар мен Ғабиден Жәкей, сазгер Қалдыбек Құрманәлі, ғалымдардан Ғарифолла Әнес, Әкім Жанұзақ, этнограф Болат Бопай, өзге де танымал азаматтар отырды. Бірлестік көшпенділер өркениетін насихаттау, Атилла тұлғасын паш ету және көкбөрі идеясын таратуды мақсат еткен. «Ұлы қазақ» идеясы күн тәртібіне шығар кез келді дейді бірлестік төрағасы Құсман Шалабаев.
«Осы бағытта жоспарлар құрып, түрлі іс-шаралар өткізуді мақсат тұтып отырмыз. Ұлы дала, Ұлы тау, Ұлы қазақ деген ұғымдар бұрыннан бар. Мұны қазір алыс-жақын шетелдегі қандастар да қызу қолдап отыр. Бірлестік 2023 жылы 6 қазанда мемлкеттік тіркеуден өткен«, — дейді Құсман Кәрімұлы.
Жиын соңында күзде өтетін Дүниежүзілік көшпенділер ойыны қарсаңында заманында Еуропада атойлаған Атиллаға қатысты ауқымды конференция ұйымдастыру ұсынылды.