Ыстықкөл жағалауындағы Чок-Тал ауылында қазақстандықтар мінген автобус апатқа ұшырады, — деп хабарлайды «ҚазАқпарат» Ыстықкөл облыстық Ішкі істер басқармасына сілтеме жасап.
Құқық қорғау органдарының мәліметінше, 11 тамызда кешкісін жүргізуші жолдағы көліктердің бірінен оза бергенде, автобусты тізгіндей алмай қалған. Автобус «Lexus» жеңіл көлігімен соқтығысып, жолдың шетіне шығып кеткен.
Оқиға салдарынан ешкім зардап шекпеген, барлығы дін аман. Ешкім дәрігерге де жүгінбеген. Жолаушылардың барлығын басқа автобусқа мінгізіп жіберген. Автобусты Қырғыз Республикасының азаматы жүргізген. Жолаушылардың барлығы – Ыстықкөлде демалып қайтқан қазақстандықтар.