Алматыда екі тұрғын үй кешенінің құрылысы тоқтатылды, деп хабарлайды Tarazy.kz
Жұмыс сапары аясында Алматы әкімінің орынбасары Бейбіт Шаханов халықаралық әуежай маңындағы бірқатар тұрғын үй кешенінің құрылыс барысын тексерген.
Тексеріс барысында Bastion тұрғын үй кешенінің құрылысы азаматтық авиация саласындағы уәкілетті органдардың келісімінсіз және рұқсатсыз жүргізіліп жатқаны анықталған.
«Қолданыстағы заңнама талаптарына сәйкес әуеайлаққа жақын аймақтарда және белгіленген күзет аумағы радиусында ғимараттардың қабатына шектеулер қойылады. Осы аймақта салынып жатқан барлық нысан тиісті келісім алуға міндетті. Мұндай құжатсыз құрылысты тоқтатамыз, қажет болған жағдайда сүріледі», — деді Бейбіт Шаханов.
Сондай-ақ, Dream City Tech тұрғын үй кешенінің құрылыс алаңында құрылыс салушы қасбетті келісімсіз қаптай бастағаны белгілі болған.
Осы заңбұзушылықтарға байланысты барлық құрылыс жұмысын міндетті келісім мен рұқсат алынғанға дейін тоқтату туралы шешім қабылданған.
