Қазақстан Жазушылар одағының қолдауымен, №178 мамандандырылған лицейдің ұйымдастыруымен қазақ поэзиясының Хан Тәңірі, ақиық ақын Мұқағали Мақатаевтың туған күніне және ақынның 95 жылдық мерейтойына орай 6-сынып оқушылары арасында «Поэзия, менімен егіз бе едің?!» тақырыбында лицейішілік байқау жоғары деңгейде өткізілді, деп хабарлайды Tarazy.kz
Аталған рухани шараның басты мақсаты – оқушылардың поэзияға деген қызығушылығын арттыру, көркем сөзге құрмет сезімін қалыптастыру, сондай-ақ Мұқағалидай ұлы ақынның шығармашылығын жас ұрпақтың санасына терең сіңіру.
Байқау ұйымдастырушысы, кәсіпкер Әбілқайыр Тілеужан бұл игі бастаманың маңызына тоқталып өтті:
«Мұқағали Мақатаев – қазақ руханиятының биік шыңы, ұлттың жүрек сөзін жырға айналдырған дара тұлға. Осындай байқаулар арқылы біз ақынға деген құрметімізді білдіріп қана қоймай, жас ұрпақты поэзияны сезінуге, сөз қадірін түсінуге тәрбиелейміз. Бұл – балалар үшін үлкен өнеге, ал болашақ үшін салынған рухани инвестиция», – деді ол.
Байқаудың жоғары деңгейде өтуіне кәсіпкерлер Жайлыханов Айдын Рысбекұлы, Издаулетов Есім, Мейрамбай Еркінгүл, Абайұлы Ғабит және Тілеужан Әбілқайыр демеушілік қолдау көрсетті. Жеңімпаздар мен жүлдегерлерге арнайы сыйлықтар, ал үздік номинация иегерлеріне естелік статуэткалар табыс етілді.
Байқаудың нәтижесін әділ әрі ашық бағалаған қазылар алқасының төрағасы – белгілі журналист, «Қала мен Дала» газетінің бас редакторы Ришат Асқарбекұлы. Сондай-ақ қазылар құрамында Dalanews.kz сайтының бас редакторы Жарас Ниязбек және өзге де саланың білікті мамандары болды.
Байқауда барлығы 5 орын сарапқа салынды. Нәтижесінде:
- Абсолютті чемпион – 6 «Б» сыныбы
- Бас жүлде – 6 «Д» сыныбы
- І орын – 6 «Г» сыныбы
- ІІ орын – 6 «А» сыныбы
- ІІІ орын – 6 «Ғ» сыныбы
Лицей әкімшілігі байқаудың өтуіне ақпараттық қолдау көрсеткен БАҚ өкілдеріне, демеушілік танытқан кәсіпкерлерге және әділқазылар алқасының мүшелеріне шынайы алғысын білдіреді.