Алматы қаласындағы ALT University-де жас түлектерді жұмыспен қамту мақсатында арнайы комиссия отырысы өтті. Іс-шараға «Көлік және құрылыс» институтының «Автомобиль жолдары және аэродромдар» мамандығын аяқтаған түлектер қатысты.
Комиссия отырысына бірқатар мекеме мен компания өкілдері қатысып, жас мамандарға жұмысқа орналасу мүмкіндіктерін таныстырды. Олардың қатарында «Жол активтері сапасының ұлттық орталығы» республикалық мемлекеттік кәсіпорны да бар. Аталған мекеме атынан HR қызметінің басшысы Әсем Мұхтарханқызы мен Алматы қалалық филиалының директоры Мәулен Тоқтарбайұлы комиссия жұмысына қатысты.
Кездесу барысында жұмыс берушілер өз ұйымдарының қызмет бағытымен таныстырып, ашық вакансиялар туралы ақпарат берді. Студенттер тарапынан қойылған сұрақтарға жауап беріліп, жұмысқа орналасудың тәртібі мен талаптары түсіндірілді.
Мұндай іс-шаралар жоғары оқу орындары мен жұмыс берушілер арасындағы байланысты нығайтуға, сондай-ақ жас мамандарды нақты жұмыс орындарымен қамтамасыз етуге мүмкіндік береді.