Иманғали Тасмағамбетов Ұжымдық қауіпсіздік туралы шарт ұйымындағы (ҰҚШҰ) Бас хатшы қызметінен кетеді, деп хабарлайды Tarazy.kz
Жақын арада ұйымға мүше елдер оның орнын басатын тұлғаны алдағы үш жылға таңдайды.
Жаңа Бас хатшы кандидатурасы 27 қарашада Бішкекте қаралады. Сол күні министрлер мен қорғаныс және қауіпсіздік кеңесі хатшыларының бірлескен отырысы өтеді.
«Кездесуде қатысушылар есірткі саудасына және заңсыз миграцияға қарсы күрес бойынша ынтымақтастық мәселелерін талқылайды. ҰҚШҰ сессиясында елдердің қауіпсіздік мәселелері бойынша ортақ позицияларын жариялайтын декларация қабылданып, 2026 жылғы Ресей төрағалығы кезінде жүзеге асырылатын басымдықтар айқындалады», – деп хабарлады ұйым.
Еске салайық, бұған дейін Тасмағамбетов Украинаға қарсы «агрессияны қолдады» деп айыпталған еді. Оның есімі украиналық «Миротворец» сайтының дерекқорында пайда болды.
Тасмағамбетовтің карточкасында оған Украинаға қарсы «агрессияны қолдады» деген айып тағылған.
Аталған интернет-ресурс журналистердің, ДНР мен ЛНР жауынгерлерінің және сайт «отанға опасыздық жасады» деп атайтын басқа да тұлғалардың жеке деректерін жариялауымен аты шыққан.
2016 жылдың көктемінде «Миротворец» ДНР мен ЛНР-дан аккредитация алған журналистердің, соның ішінде шетелдік тілшілердің де, тізімін олардың байланыс ақпараттарымен бірге жариялаған.
Мұның нәтижесінде кейбір журналистерге қоқан-лоқы жасалған жағдайлар тіркелген.
