Жамбыл облысында Ұлы Отан соғысындағы Жеңістің 75 жылдығын мерекелеуге арналған іс-шаралар жоспары бекітілді. Барлық мерекелік іс-шаралар онлайн-форматта өтеді, — деп хабарлайды Tarazy.kz тілшісі.
Қыркүйек айында мектептерде патриоттық және ерлік сабақтарын өткізу жоспарлануда.
Бүгінгі таңда Жамбыл облысында Ұлы Отан соғысының 57 ардагері мен мүгедегі тұрады. Олардың әрқайсысына Жеңіс күніне орай 1 миллион теңге көлемінде әлеуметтік көмек көрсетілмек.
Сонымен қатар, ҰОС қатысушылары мен мүгедектеріне теңестірілген 1989 адам 100 мың теңгеден алады. Тыл еңбеккерлері де назардан тыс қалмаған. Соғыс жылдарында тылда 6 айдан астам жұмыс істеген 4742 адам 50 мың теңгеден алады. Ұлы Отан соғысына қатысушылардың 337 жесірі мен ҰОС мүгедектерінің әйелдері де әлеуметтік көмек алады. 60 мың теңгеден Ленинград қоршауының үш бұрынғы тұтқынына және концлагерьдің үш тұтқынына төленеді.
Сондай-ақ, ҰОС ардагерлері мен тыл еңбеккерлеріне Мемлекет басшысының атынан медальдар, алғыс хаттар мен азық-түлік себеттері беріледі.
Жамбыл облысының аумағында 197 Ұлы Отан соғысы батырларына ескерткіш орнатылды, оның 11-і 11 мемориалдық тақта.
Кеңес Одағының Батырлары мен «Даңқ» орденінің иегерлерінің есімдері облыс бойынша бір елді мекенге, үш ауылдық округке, 41 нысанға, 575 көшеге берілген.
Сондай-ақ, Жамбыл облысының әкімі Бердібек Сапарбаев Ұлы Отан соғысының ардагері, Жамбыл облысының және Тараз қаласының Құрметті азаматы Тілеуқабыл Төребековті 95 жылдығымен құттықтады, сондай-ақ ел Президенті Қасым-Жомарт Тоқаевтың Құттықтау хатын тапсырды.
Жамбыл облысында Тілеуқабыл Төребекұлы Төребеков туралы білмейтін адам кемде-кем.
Кеңес Әскерінің қатарында милитаристік Жапониямен соғысқан ержүрек майдангер Т. Төребеков соғыс аяқталған соң барлық күш-жігерін Жамбыл облысының дамуына арнады. 1950-1966 жылдар аралығында ол облыстық партия комитетінің бірінші хатшысының көмекшісі, бөлім меңгерушісі болып жұмыс істеді. Жамбыл қалалық партия комитетінің екінші хатшысы, 1970 жылдан 1983 жылға дейін Жамбыл қалалық атқару комитетінің төрағасы қызметін атқарды. Тілеукабыл Төребекұлы құрметті демалысқа шыққанда да қоғамдық жұмыстан тыс қалған жоқ. 1995 жылдан 2015 жылға дейін облыстық Ардагерлер кеңесін басқарды.
Ол ІІІ дәрежелі Даңқ, ІІ дәрежелі Отан соғысы, Еңбек Қызыл Ту, «Құрмет Белгісі» ордендерімен, 13 медальмен, оның ішінде «Ерлігі үшін»медалімен марапатталған. Алты бала тәрбиелеп өсірген.
Қазақстан Республикасының Президенті Қасым-Жомарт Тоқаев өз хатында аға ұрпақ — Т. Төребеков сияқты тұлғалардың өмір жолы бүгінгі ұрпақ үшін үлгі — өнеге болып табылатынын атап өткен.
Қариямен әңгіме барысында Бердібек Сапарбаев еңбек сіңген ардагердің өңірдің әлеуметтік-экономикалық дамуына қосқан зор үлесін, оның ұйымдастырушылық қабілетін және біліктілік қасиеттерін тілге тиек етті.
Тілеуқабыл Төребекұлы әлі күнге бақуатты. Ақсақалдың тұлғасында даналық пен абыздық әдемі жарасым тапқандай. Өңір басшысы Ұлы Жеңістің 75 жылдығымен құттықтап, ардагерге бір миллион теңгегелік сертификат табыс етті.