Жоба аясындағы қабылдау

0

Облыс әкімінің бастамасымен қолға алынған «Бейбітшілік пен келісім» жобасы сәтімен жүзеге асуда. Жаңа жоба жамбылдық жұртшылық тарапынан қолдау тапқан. «Ақпараттық-түсіндіру», «Әлеуметтік-тұрмыстық мәселелерді шешу», «Ауылда бизнесті дамыту», «Діни мәселелер», «Құқық қорғау саласы» топтарының мүшелері өзге ұлт өкілдері көп шоғырланған аудандарда болып, тұрғындармен кездесулер, көшпелі қоғамдық қабылдаулар өткізуде. Тұрғындардың өтініш-тілегін тыңдап, мұң-мұқтажын біліп, түйіні тарқамаған түйткілді мәселелердің түйінін тарқатуда.Дүйсенбі күні аудан әкімдігінің мәжіліс залында аудан әкімі Сәкен Арубаев ауданымызға ат басын тіреген «Құқық қорғау саласы» тобы мүшелерінің қатысуымен жиын өткізді.

– «Бейбітшілік пен келісім» жобасының мақсаты ел бірілгі мен ынтымағын сақтау, тұрғындарды адамгершілік құндылықтарға үндеу, қоғамдық келісім мен тұрақтылықты қамтамасыз ету үшін құқықтық сауаттылықтың рөлін арттыру, қоғамдық-саяси ахуалды мониторингілеу, жергілікті халықты толғандыратын өзекті мәселелерді анықтап, оның шешу жолдарын қарастыру болып табылады.

Бүгін сіздер ауданымызға қарасты ауылдық округтерге барып, тұрғындарды толғандыратын сауалдарға жауап беру мақсатында көшпелі қоғамдық қабылдау өткізбексіздер. Сіздердің тараптарыңыздан берілген ақпараттар тұрғындарға пайдалы болатынына сенімдімін. Аудан әкімдігі тарапынан ұйымдастыру жұмыстарына қолдау білдіріледі. Бүгінге жоспарланған іс-шараны өз деңгейінде өткізіп, абыроймен атқарып шығуларыңызға тілектеспін. Іске сәт! – деді Сәкен Қаланұлы басқосу барысында.

Жиыннан кейін облыс прокурорының бірінші орынбасары Қанат Мамаев жетекшілік ететін топ мүшелері ауылдық округтерде көшпелі қоғамдық қабылдау өткізді. Ұлттық қауіпсіздік комитетінің облыстық департаменті, облыстық полиция департаменті, сыбайлас жемқорлыққа қарсы іс-қимыл агенттігінің облыстық департаменті, экономикалық тергеу департаменті, қорғаныс істері департаменті, мемлекеттік кірістер департаментінің жауапты қызметкерлері ауыл тұрғындарын жеке сұрақтарымен қабылдады.

Қабылдауда жергілікті тұрғындар тек қана жеке басының ғана емес, елге ортақ өзекті мәселелерді де қаузады. Мәселен, аудандық билер кеңесінің төрағасы Рахымбек Жапаров Аса ауылында мал жайылымы тарылғанын алға тартса, аудандық ардагерлер кеңесінің мүшесі Ахан Сыдықов Б.Момышұлы көшесіндегі трансформатор күйіп кеткеніне байланысты көше жарығы әлі күнге дейін жөнделмегенін айтып шағымданды. «Досым» шаруа қожалығының төрағасы Досым Каипов «Қуат» каналына жөндеу жұмыстары жүргізіліп жатқанын, бірақ канал бойынан су алатын алқаптарға шлюздер қойылмағанын, қойылмайтынын, себебі, мердігерлер жобада шлюздердің жоқ екенін, көрсетілмегенін айтатынын жеткізді. Аса ауылының тұрғыны Тәліп Омаров ауылдағы темір жолдың арғы бетінде тұратын тұрғындардың атынан келіп тұрғанын, тұрғындар тілегі «аспалы көпір» екенін тілге тиек етті.

Бұдан бөлек, топ мүшелері тұрғындардың азаматтық алуға құжат тапсыру, көлік салығы, ауылға ғаламтор желісін тарту, ауылды газдандыру, жер телімін алу, атаулы әлеуметтік көмек, тұрғын үй алу, жол белгілерін қою, егін су, кәсіп ашу туралы сауалдарына жауап берді. Тұрғындар көтерген мәселелер назардан тыс қалмайтынын, алдағы уақытта шешімін таппаған мәселелердің шешу жолдарын қарастыратындарын айтты.

Екі күнге созылған топтың жұмысы бүгін қорытындылатын болады.

Ильяс Қалыбеков, «Шұғыла-Радуга» редакциясының тілшісі

Оставьте ответ

Ваш электронный адрес не будет опубликован.