Алматы қаласында көлік қозғалысын жақсартуға бағытталған маңызды инфрақұрылымдық жобалардың бірі – Төле би көшесін Яссауи көшесінен Әшімов көшесіне дейін ұзарту жұмыстары қарқынды жалғасуда. Қазіргі уақытта нысанда жаңа асфальтбетон қабатын төсеу кезеңі жүргізілуде, деп хабарлайды Tarazy.kz
Жол құрылысы барысында сапа талаптарының сақталуы ерекше назарда. Осыған байланысты Жол активтері сапасының ұлттық орталығы Алматы қалалық филиалының инженерлері құрылыс алаңында тұрақты бақылау жұмыстарын жүргізіп келеді. Мамандар асфальтбетон қоспасының төселу технологиясын, жұмыстардың нормативтік талаптарға сәйкестігін және құрылыс процесінің сапасын қадағалауда.
Филиал инженері Мейіржан Мырзахметтің айтуынша, жолдың ұзақ мерзімді пайдаланылуы құрылыс жұмыстарының сапасына тікелей байланысты.
«Біздің мамандар құрылыс-монтаж жұмыстарының барлық негізгі кезеңдеріне қатысып, технологиялық талаптардың сақталуын бақылауда ұстайды. Асфальтбетон жабынын төсеу кезінде материалдардың сапасы мен төсеу процесінің нормативтерге сәйкестігіне ерекше көңіл бөлінеді. Мұндай бақылау болашақта жолдың беріктігі мен пайдаланушылар үшін қауіпсіздігін қамтамасыз етуге мүмкіндік береді», – деді Мейіржан Мырзахмет.
Айта кету керек, Төле би көшесін ұзарту жобасы қаланың көлік инфрақұрылымын дамытуға және жол желісінің өткізу қабілетін арттыруға бағытталған. Жол активтері сапасының ұлттық орталығының мамандары нысан толық пайдалануға берілгенге дейін құрылыс жұмыстарының сапасына мониторинг жүргізуді жалғастырады.
