Бүгін құрылыс саласының қызметкерлері өздерінің кәсіби мерекесін атап өтіп жатыр. Тамыздың екінші жексенбісі құрылысшылар күні болып бекітілген, деп хабарлайды Tarazy ақпарат.
Құрылыс саласы – ел экономикасының маңызды секторларының бірі. Орталық коммуникациялық қызметі ұсынған статистикаға сәйкес, қазіргі уақытта 53 мың компанияда шамамен 648 мың құрылыс саласының маманы жұмыс істейді. Олардың қатарында бетоншылар, сәулетшілер мен тас қалаушылар, жол құрылысының мамандары бар. Жол құрылысы – көлік логистикасы мен жолаушы тасымалы үшін өзекті сала. Қазіргі уақытта еліміздегі автожолдардың жалпы ұзындығы 95 мың шақырымды құрайды, оның 25 мың шақырымы республикалық желіге, ал 70 мың шақырымы жергілікті желіге жатады. Атаулы күн құрылыс саласындағы автожол инфрақұрылымын дамытуда еңбек етіп келе жатқан жолшы қызметкерлерді де біріктіретін кәсіби мереке.
Мереке қарсаңында «Жол активтері сапасының ұлттық орталығы» мекемесі де ерекше құрметке бөленіп, бірнеше қызметкер марапатқа ие болды. Салтанатты іс-шара Астана қаласында өтті. Мерекелік жиынға қатысқан ЖАҰСО Алматы филиалының директоры Мәулен Әліпов ауқымды басқосу жол саласын ары қарай дамытуға септігі тиеді деген пікірде.
«Мерекелік салтанаттың ауқымы – Орталық Азия мемлекеттерінің түгелдей қатысуынан айқын көрінеді. Біздің мекеменің 20 өңірдегі филиал басшылары қатысты. Жол құрылысы саласында ұзақ жыл еңбек етіп, автожол саласын дамытуға үлес қосқан ардагерлер де құрметке ие болды. Мысалы, Жол активтері сапасының ұлттық орталығы Түркістан облыстық филиалының директоры, Ақтөбе облыстық филиалдың директоры және Павлодар облыстық филиалдың инженері марапатталды. Бұл аталған саланың ары қарай дамуына серпін берері сөзсіз», дейді Мәулен Тоқтарбайұлы.
Биыл Көлік министрі Марат Қарабаев дәстүрлі түрде автожол саласының үздік мамандарының еңбегін атап өтіп, құрмет грамоталары мен алғыс хаттарды, сондай-ақ, үздік жетістіктері үшін медальдарды табыстады. Аталған марапаттар жол саласы қызметкерлерінің көлік инфрақұрылымын дамытуға қосқан үлесінің маңыздылығының көрінісі. Іс-шараға Тәжікстан, Қырғызстан, Өзбекстан және Түрікменстан Көлік министрлері қатысты. Бұл автожол желісін дамыту саласындағы халықаралық ынтымақтастықтың айқын бейнесі.