Aqyl Battle қосымшасының негізінде республикалық «AQYL BATTLE CUP» сайысы өтпек. Бұл туралы жобаның әлеуметтік желідегі парақшасында жарияланды.
Жалпы жүлде қоры: 2 миллион 600 мың теңге. Сайысқа 14-35 жас аралығындағы жастар қатысады.
Сайыс 3 кезеңнен тұрады:
1. Aqyl Battle қосымшасының ішінде онлайн іріктеу;
2. Бұл кезеңге 20 өңірден 100 үздік ойыншы іріктеледі. Әр облыс орталығында оффлайн турнир өтеді. Мысалы, Ақтөбе облысының ойыншылары Ақтөбе қаласына келіп ойнайды.
3. Екінші кезеңнен үздіктер іріктеліп, команда құралады. Үшінші кезең Астана қаласында сайыс өтеді. Оған әр өңірден 6 қатысушы, жалпы 120 ойыншы қатысады.
Яғни бірінші кезеңде онлайн форматта әр адам жеке қатысады. Соңғы 2 кезеңде іріктелген адамдар арасында командалық ойын өтеді.
ҚР Ақпараттық және қоғамдық даму министрлігінің қолдауымен өткізіледі. Алдағы уақытта толық шарттарымен таныс боласыздар. Посттар мен стористерді жіберіп алмаңыздар.
Aqyl Battle — интеллектуалдық мобильді ойын, еліміздегі ең ірі IT жобалардың бірі. 2022 жылдың күзінде халыққа ұсынылып, жарты жыл ішінде 555 мыңнан астам адам жүктеп алды, 30 миллионға жуық ойын ойналды.
Aqyl Battle 30 түрлі саланың қызықты сұрақтарын қамтиды. Ойыншылар өзара батл форматында сұрақтарға жауап беріп жарысады. Ойында жинаған ұпайларды Aqyl Жұма деп аталатын онлайн жәрмеңкеде түрлі бағалы сыйлықтарға айырбастауға болады. 31 наурыз бен 10 сәуір аралығында алғашқы жәрмеңке өтті. Сыйлықтар қатарында iphone 14, Дубай, Абу-Даби қалаларына саяхатқа жолдамалар, АҚШ, Еуропа елдеріндегі үздік университеттерге грантқа түсуге дайындайтын курстар, тұрмыстық техникалар үлестірілді.
Аталмыш жобаны идеология ретінде қарастыруға болады. Ондағы сұрақтар тарихтан бастап түрлі тақырып төңірегінде болады. Мысалы, ұмыт болған салт-дәстүрлер, ағылшын тілін меңгеру, қаржылық сауатты арттырып, алғашқы медициналық көмек туралы да білуге болады.
Қазақ тілді жоба интернетте бірқатар танымал ойындарды артта қалдырып, рейтингте бірінші орынға да шыққан.
«Бастапқы ойымыз қазақша викториналық ойын жасау болды. Ойлағанымыз іске асты. Алдағы уақытта қазақша контент те, оны тұтынатын аудитория да өсе береді. Бұл дегеніміз, қазақша IT жобаларға да сұраныс артатынын көрсетеді. Біз осыны ескере отырып Aqyl Battle-ды жасадық. Нәтижесі де біз күткеннен әлдеқайда жоғары болды. Garena, Durak, Roblox сынды ойындарды артта қалдырып, Қазақстанда ең көп жүктелген ойындар қатарында App Store мен Play Market-те бірінші орында тұрмыз», – деді IT маманы Айболат Құлатай.
