Ауыл шаруашылығы басқармасының басшысы Берік Нығмашевтің айтуынша, ұн, макарон, жұмыртқа және сары май өндірісін екі есеге ұлғайту үшін жергілікті ресурстар жеткілікті. Бір ай ішінде қайта өңдеу кәсіпорындарының әлеуетіне мониторинг жүргізіліп, азық-түлік тауарларын өндіру мен тұтыну арасындағы балансты сақтау жөнінде ұсыныстар әзірленбек , — деп хабарлайды Tarazy.kz тілшісі.
Өңір басшысы көкөніс сақтау қоймаларының жай-күйіне зерделеу жүргізудің маңыздылығына тоқталып, қажет болған жағдайда мемлекеттік-жекеменшік әріптестік негізінде жаңа құрылыс салу керектігіне көңіл бөлді. Бұл жұмыстарға тарту үшін бизнес өкілдері арасында түсіндіру жұмыстарын жүргізу қажет. Аудан әкімдері тиісті жер телімдерін барынша қысқа мерзімде бөлуді қарастырғаны абзал.
Облыста өндірілмейтін немесе олардың тапшылығы байқалатын өнімдерді жеткізіп отыру бойынша басқа өңірлермен уақыт созбай келісім орнату қажет. Бірінші кезекте бұл ұн, макарон, күріш, бұршақ, өсімдік майы, қарақұмық тауарларына қатысты. Сәуір-мамыр айларында облыс қырыққабат және картоп импортына тәуелділікті сезіне түсуде. Бұршақ, алма, балық, қаймақ, сүзбе және басқа да өнімдер толық және жартылай көлемде жеткізілуде.
Экономика және бюджеттік жоспарлау басқармасының басшысы Гүлдана Жауынбекова хабарлағандай, ағымдағы жылдың бірінші тоқсанының қорытындысы бойынша тамақ өнеркәсібі 47,4 пайыз, химия өнеркәсібі 8,8 пайызға төмендеген. Бірінші жағдайдағы құлдырау көрсеткіші қант зауыттарын тоқтайына байланысты орын алған.
Баяндамашы жоғарыда аталған салалардағы шығындардың орнын толықтыра алатын өнімдердің тізбесі мен көлемін тілге тиек етіп, соның ішінде құрылыс, құрылыс материалдары мен металдар өндірісіне назар аудартты.
Облыс әкімі кәсіпкерлік және индустриалды-инновациялық даму басқармасы басшысының міндетін атқарушы Жандәулет Кенжебековтің баяндамасын тоқтатуға мәжбүр болды.
— Маған басқа салалардағы шығындарымызды алмастыратын өнім түрлеріне талдау қажет. Пайдалы қазбалар бойынша зерделеу шараларын ұйымдастырып, оларды игеру үшін инвесторларды жедел тарту қажет. Көптеген кәсіпорындар жұмыс істеуге, өнім көлемін арттыруға ниет білдіріп отыр, алайда басқарма мен басқа да жауапты құрылымдар тарапынан қолдау жоқ. Сіздің басты міндетіміз –индустрияны, кәсіпкерлікті дамыту мәселелерімен айналысу.
Дағдарыс – бұл жаңа мүмкіндіктер уақыты, оны пайдаланбау ақымақтық болар еді. Өндіріс пен тұтыну арасындағы балансты жүзеге асыру жолдарын іздеу, өндірістік күштерді орналастыру схемасын құру қажет. Экономикада жеңіл, тамақ және қайта өңдеу өнеркәсібінің үлесін арттыру жолдарын ойластыру керек.
Біз неге өзімізді сол макаронмен, балықпен қамтамасыз ете алмаймыз? Ал облыста су қоймалары жеткілікті. Аудан әкімдері өндірістерге жиі барып, олардың ассортиментін кеңейтіп, толық қуаттылыққа жұмыс істеуі үшін барлық мүмкіндіктерді қарастыру керек, — деп тапсырды облыс әкімі.
Күн тәртібіндегі келесі мәселені бойынша ветеринарлық қауіпсіздікті қамтамасыз ету, аусылмен, бруцеллезбен және конго-қырым геморрагиялық қызбасымен күрес, эпизоотияға қарсы іс-шараларды қаржыландыру, 36 ветеринарлық пункттің өз ғимараттарының жоқтығы, қаңғыбас иттер мен мысықтарды орналастыруға арналған арнайы питомниктердің тапшылығы және басқа да мәселелер талқыланды.