Жамбыл облысы Мойынқұм ауданының аумағында жол-көлік оқиғасы салдарынан қаза тапқан полицейлердің есімі белгілі болды, — деп хабарлайды Tarazy.kz тілшісі.
«Өз міндетерін адал атқарып, қызмет бабында қаза болған полиция майоры Саят Қосдаулетұлы Тлеубердиевке жəне полиция аға сержанты Мұрат Базарқұлұлы Базарқұловқа əскери құрмет көрсетілді. Мойынқұм АПБ ғимаратының алдында қызмет бабында қаза болған милиция капитаны Б.Амантаевтің құрметіне орнатылған «Міндет, абырой, ерлік» ескерткішінің алдында АПБ жеке құрамы сапқа түзіліп, бір минут үнсіздіктен соң құрмет салюты үш дүркін атылып, əріптестерімізді соңғы сапарға шығарып салдық. Жатқан жері иманды, топырағы торқау болсын!», — делінген Мойынқұм полициясының Instagram желісіндегі парақшасында.
Жамбыл облыстық полиция департаменті баспасөз қызметінің жетекшісі Гүлсара Мұхтарқұлова жоғарыда көрсетілген азаматтардың Мойынқұм аудандық полиция бөлімшесінің қызметкерлері болғанын және 13 шілдеде жұмыс бабында жүріп жол апатынан қаза тапқанын растады.
Полиция майоры Саят Тлеубердиев жəне полиция аға сержанты Мұрат Базарқұлов
Айта кетейік, 13 шілдеде Жамбыл облысы Мойынқұм ауданы аумағында SsanYong маркалы автокөлік аударылып, салдарынан Мойынқұм аудандық полиция бөлімінің екі қызметкері және бір Өзбекстан Республикасының азаматы қаза тапты.
Кейінірек, Желіде полицейлер қаза тапқан жол апаты болған жерде түсірілген суреттер пайда болды.
Осы іс бойынша соталды тергеу шаралары ҚР ҚК-нің 345-бабы 4-бөлігі («Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы») бойынша жүріп жатыр.
Суреттер: instagram.com/moinkum_police
Ақпаратты көшіріп басқанда Tarazy.kz сайтына гиперсілтеме міндетті түрде қойылуы тиіс. Авторлық құқықты сақтаңыз!
