“Теріскей бізге аманат” деп солтүстік өңірге адамдарды көшіруге үндеп жүрген белсенді Бурахан Дақанның Қызылжар маңындағы Сергеевка ауылындағы үйі өртеніп кетті, деп хабарлайды Tarazy ақпарат.
Бұл туралы белсенді өзінің әлеуметтік желідегі парақшасына жариялады. Оның айтуынша өрт электр сымдарының қысқа тұйықталуынан шыққан. Қызыл жалын баспананы түгел шарпып, барлық дүние мүлік өртеніп кетіпті. Отбасы мүшелері сыртқа шығып үлгеріпті, ешкім зардап шекпеген. Ештеңесіз қалдық деген Бурахан көпшіліктен көмек сұрауға мәжбүрмін дейді.
“Бөрі арығын білдірмес, сыртқы жүнін қампайтып” демекші, өздеріңізден көмек сұрап тұрмын, ағайын! Бір қабат киіммен ғана сыртқы жүгіріп шықтық. Басқа киім-кешек, дүние отқа оранды. Мұндағы үйлер ағаштан салынған. Ал сырты мынадай пеноплекспен қапталған ғой. Бұл бәле от тисе лап етеді екен. Барынша қолдап, көмектесіп жіберіңіздерш!” деген белсенді мүмкіндігінше көмек қолын созуды өтінген видео таратты.
