Қазақстан — табиғи байлығы мол, тарихи-мәдени ескерткіштерге бай ел. Алайда, туризм саласы әлеуетіне сай дамымай келеді. Басты себептерінің бірі — инфрақұрылымның әлсіздігі. Көптеген көрікті жерлерге баратын жол нашар, қонақүйлер, қоғамдық көлік және сервистік қызметтердің деңгейі төмен.
Сонымен қатар, шетелдік туристтерге бағытталған
ақпараттың аздығы, визалық мәселелер мен интернеттегі жарнама жұмыстарының жеткіліксіздігі де әсер етеді. Ішкі туризм де халықтың қаржылық мүмкіндігі мен инфрақұрылым жағдайына байланысты шектеліп отыр.
Дегенмен, мемлекет туризмді дамытуды стратегиялық
бағыттардың бірі ретінде қарастырып отыр. Түркістан,
Алматы, Бурабай, Балқаш, Шығыс Қазақстан облысы, Көлсай, Қайыңды, Баянауыл,Маңғыстау және Алакөл секілді аймақтарда туристік кешендер жаңартылуда. Электронды виза жүйесі енгізіліп, туристік операторларға салықтық жеңілдіктер қарастырылуда.
Болашақта Қазақстан туризмін дамыту үшін цифрландыру, экотуризмді ілгерілету, жастар туризмін қолдау және жергілікті халықтың ағылшын тілін меңгеруін арттыру маңызды. Туризм тек экономикалық емес, мәдени дипломатия құралына да айнала алады.
Дінасыл Хамит