Алматы облысының Райымбек ауданында Баққожа Мұқай атындағы аудандық мәдениет үйінде ауданнан шыққан белгілі спорт майталмандарының қатысуымен “ХАН ТӘҢІРІ ЕТЕГІ — ЧЕМПИОНДАР МЕКЕНІ” атты форум өтті, деп хабарлайды Tarazy ақпарат.
Форумға КСРО кубогының иегері, КСРО халықтары спартакиадасының күміс жүлдегері, КСРО және ТМД біріншілігінің қола жүлдегері, Азия чемпионы, Шығыс және Орталық Азия ойындарының екі дүркін жеңімпазы, Азия кубогының төрт дүркін иегері, Азия ойындарының жеңімпазы, сондай-ақ Олимпиада ойындары мен Әлем чемпионатының қола жүлдегері Мәулет Сатымбайұлы Мамыров, Кикбоксингтен европаның екі дүркін чемпионы Елмұрат Қайыпжанов, қол күрестің хас шебері, әлем чемпионаттарының бірнеше дүркін жүлдегері Береген Спатаев, қазақ күресінен халықаралық дәрежедегі спорт шебері, қазақ күресі мен дзюдо күресінен еңбек сіңірген жаттықтырушы Еркін Мұқашұлы Сайдақов, қазақ күресінен спорт шебері, «Түйе палуан» Жангелді Хамитов Аманкелдіұлы, зілтемірші, әлем чемпионы Жасұлан Қыдырбаев, Қазақстанның «Темір адамы» атанған Тимур Спатаев, боксшы, жастар арасында үш дүркін Азия чемпионы, екі дүркін Әлем чемпионы, Әлем кубогінің екі дүркін қола жүлдегері Толғанай Қасымхан сынды спорт майталмандары мен саңлақтары қатысты.
Форумның мақсаты, өскелең ұрпаққа ауданнан шыққан спорт майталмандарының жеткен жетістіктерін насихаттау.
Аталған шара ауданымыздың спорттық әлеуетін нығайтып, жаңа чемпиондар легін дайындауға ықпал ететін маңызды шара болды.