Түркістан облысында 26 онлайн несие рәсімдеді деген күдікке ілінген ер адам ұсталды, деп хабарлайды Tarazy.kz
Otyrar.kz таратқан ақпаратқа сәйкес, өңірде киберқылмыспен күрес бағытындағы жұмыстар қарқынды түрде жалғасып жатыр.
Өңірлік коммуникациялар қызметінде өткен брифингте ПД Киберқылмысқа қарсы іс-қимыл басқармасы басшысының міндетін атқарушы Ермек Шаким интернет алаяқтығына байланысты қазіргі ахуалға тоқталды.
Оның айтуынша, алаяқтардың ең жиі қолданатын тәсілдері – банк қызметкеріміз деп телефон соғу, алдын ала төлем талап ету, күмәнді инвестицияларға ақша салуды ұсыну, таныстың атын жамылып қаражат сұрау, сондай-ақ жалған сыйлықтар мен ұтыстарды алға тарту.
Жыл басынан бері полицейлер бірнеше көпэпизодты қылмысқа қатысы бар адамдарды анықтап, қолға түсірген.
Сауран ауданының тұрғыны өзге азаматтардың атына 26 онлайн несие рәсімдеді деген күдікпен ұсталды.
Сонымен бірге Мақтаарал ауданының тұрғыны өзін жұмысқа тұрғызып беремін деп, сегіз адамды алдаған, ал Шымкент қаласының бір тұрғыны осындай төрт қылмысқа қатысы бар екені белгілі болды.
