І.Жансүгіров атындағы Жетісу университетінде «Өзгермелі парадигмалар тұсындағы құндылықтар: ХХІ ғасырдағы тұлға, қоғам және өркениет бағдары» атты халықаралық ғылыми-тәжірибелік конференция өтті. Конференция жұмысына қазақстандық және шетелдің жоғары оқу орындарының ғалымдары мен оқытушылары, мемлекет және қоғам қайраткерлері, Жетісу облысы әкімінің орынбасары М.Көлбаев, облыстық мәслихат төрайымы Г.Тойлыбаева қатысты, деп хабарлайды Tarazy.kz
Пленарлық мәжілісті Басқарма төрағасы – ректор, заң ғылымдарының докторы, профессор Ермек Бөрібаев ашып аталған конференцияның ғылыми және қоғамдық маңызына тоқталды.
«ЖаҺандану, цифрландыру және жасанды интеллект тұсындағы құндылықтар трансформациясын зерттеу аса маңызды. Бүгінгі конференцияда құндылықтар талдауға, салыстыруға және эмпирикалық тұрғыда тексеруге болатын динамикалық құбылыс ретінде қарастырылады», — деді Е.Бөрібаев.
Жетісу университеті ұйымдастырған халықаралық ғылыми-тәжірибелік конференцияға ҚР Ғылым және жоғары білім министрі С.Нұрбек арнайы Алғы сөз жолдады. Онда министр конференция қатысушыларын құттықтай отырып, «Құндылықтар жүйесінің трансформациясы, жаҺандандыру мен цифрландыру қоғамның рухани-адамгершілік даму бағыттарын айқындау — қазіргі мемлекеттік саясаттың басымдықтарының бірі. Бұл конференция өзгермелі әлеуметтік, мәдени және технологиялық ортада құндылық бағдарларын жаңаша пайымдаудың өзектілігін танытатын ғылыми диалог алаңы ретінде құндылық саясатын жаңаша дамытуға үлес қосады деп сенемін»-деді.
Пленарлық мәжілісте философия ғылымдарының докторы, Абай атындағы Қазақ ұлттық педагогикалық университетінің профессор-зерттеушіcі А.Кулсариева, ҚР БҒМ Ғылым комитеті Философия, саясаттану және дінтану институтының бас ғылыми қызметкері, философия ғылымдарының докторы, профессор Н.Сейтахметова баяндама жасады. Баяндамашылар қоғамдық құндылықтардың үдемелі трансформациясы жағдайында тұлғаның дамуына ықпал ететін жаңа бағыттарды айқындау мәселесін көтерді. Ресейлік ғалым, философия ғылымдарының докторы, профессор А. Колесников мәдениетаралық философия жайында ой қозғады. әл-Фараби атындағы Қазақ Ұлттық университетінің ғалымы, қауымдастырылған профессор Б. Мейрбаев «XXI ғасырдағы құндылықтардың трансформациясы: адам философиясы және гуманизм негіздері» тақырыбында мазмұнды баяндама оқыды. Қ.Қарасаев атындағы Бішкек мемлекеттік университетінің профессоры Г.Ботоканова заманауи қиындықтар мен дәстүрлі мәдениет тұрғысындағы ғылыми баяндамасын ұсынды. Философия ғалымдары Ә.Құранбек P4C жаһандық қозғалысы және қазақстандық зертттеулер мен ізденістер, Н.Байтенова ХХІ ғасырдағы жаһандық турбуленттілік жағдайында құндылық парадигмаларының трансформациясының философиялық негіздері, А.Құрманалиева Тілдік негіздегі ұлттық біртұтастық: мультимәдени медиакеңістіктің қазақ балаларының тілдік машықтарына ықпалы тақырыбында өз ойларын ортаға салды.
Қазақстанның Құрметті жазушысы, Халықаралық «Алаш» әдеби сыйлығының лауреаты, Бүкіләлемдік Шыңғысхан Академиясының академигі Ә.Әрін маңызды баяндама жасады.
«Қазақ халқының тарихын зерттеу – ұлттың рухани тамырын танудың, мәдени болмысын сақтаудың маңызды жолы. Бұл жолда тарихи деректерді ғылыми негізде талдап, ауызша және жазбаша мұраларды салыстыра отырып, шынайы қорытынды жасау қажет. Тарихты бұрмаламай жеткізу – өткенге құрмет, болашаққа аманат. Сондықтан әр зерттеуші мен әрбір азамат тарихи фактілердің дәлдігіне мән беріп, идеологиялық не субъективті көзқарастардан ада, әділ әрі ақиқат көзқарасты ұстануы тиіс»,- деді ол.
Конференцияның секциялық мәжілісі «Құндылықтарды зерттеудің философиялық негіздері мен әдіснамасы», «Цифрландыру мен жасанды интеллект (ЖИ) жағдайындағы тұлға құндылықтары сынақ әрі мүмкіндік ретінде», «Қоғам және құндылықтар: дәстүр және жаңғыру», «Мәдениетаралық коммуникация және өркениеттер диалогы», «Әдебиет пен өнер құндылықтарды сақтаушы ретінде», «ХХІ ғасырдың құндылық бағдары аясындағы білім мен тәрбие» бағыттары бойынша өтті.
Халықаралық ғылыми-тәжірибелік конференция ғалымдар үшін ХХІ ғасырда адамның тұлғалық дамуы, қоғамдық институттардың тұрақтылығы және өркениеттік прогрестің үйлесімді траекторияларын талқылау, сондай-ақ гуманитарлық, әлеуметтік, мәдени және философиялық салалардағы ғылыми пікір алмасу алаңы болды.
Конференция соңында А.Кулсариева мен Е.Бөрібаевтың редакторлығымен жарық көрген «Парадигмы ценностных установок и ценностного сознания в казахстанском обществе: тренды, динамика, переспективы» ұжымдық монографияның тұсаукесері өтті.
Еліміздің Тәуелсіздік күніне орай ұйымдастырылған шара ҚР ҒЖБМ қаржыландыратын «Тәуелсіздік кезеңіндегі қазақстандық қоғамның құндылық бағдарларының эволюциясы және трансформациясы» атты бағдарламасын іске асыру аясында өтті.
