Қазақстанда Burger King Kazakhstan желісіне қатысты дау күшейіп келеді, деп хабарлайды Tarazy.kz
Даудың туындауына әлеуметтік кәсіпкер Жанат Каратайдың әлеуметтік желідегі жазбасы себеп болды. Ол аутизм спектріндегі бұзылысы бар 27 жастағы ұлы Әлібектің еңбек жолы мен соңғы уақытта болған жағдайды баяндаған.
«Аутизмі бар ұлым Әлібек Қаратай. Көпшілік оны таниды. Қазір ол 27 жаста. 1998 жылы дүниеге келді. Екі жасында-ақ бір нәрсенің дұрыс емес екенін байқадық. Ол – екінші балам. Сөйлемеді, тілге келмеді. Ол кезде “аутизм” деген ұғым да, тіпті “сөйлеу дамуының кешеуілдеуі” деген түсінік те кең таралмаған еді. Мен IT саласындағы жұмысымды, болашағы зор мансабымды тастап, бәрін өзім зерттеп, баламмен айналысуға бел будым. Жылдар бойы педагогика мен оңалтуға толықтай ден қойдық. Соның нәтижесінде ол мектепті бітіріп, Жүргенов атындағы колледжде оқыды, мүсінші мамандығын меңгерді, пластилиннен анимациялық мультфильмдер жасауға қызықты. Әртүрлі жерде жұмыс істеп көрді. Ақыры өзіне ұнайтын ұжым мен мамандықты тапты – Burger King-те аспаз болып еңбек етті», – деп жазды анасы.
Оның айтуынша, Әлібек төрт жыл бойы тұрақты жұмыс істеп, жалақы алып, өзін ұжымның толыққанды мүшесі ретінде сезінген.
«Төрт жыл бойы үздіксіз жұмыс істеді, жалақы алды, тапқан табысын қуана жұмсады. Ұжымға қажет екенін сезінді. Жұмыс қызған кезде қосымша ауысымдарға қалатын. Демалысын өзі жоспарлап, бір филиалдан екіншісіне ауысып жүрді. Бұл – біздің отбасының мейрамхана әкімшілері мен менеджерлерімен бірлескен еңбегінің нәтижесі. Бізге қолдау көрсеткен Ширин есімді менеджерге және Әлібектің тікелей жетекшісі Ерланға өмір бойы ризамыз», – дейді Жанат Каратай.
Алайда, оның сөзінше, жаңа өңірлік басшы келгеннен кейін жағдай өзгерген.
«Жаңа өңірлік басшы Сергей келген сәттен бастап бәрі өзгерді. Жасырын қысым басталды. Күзден бері Әлібек мүлде өзгеріп кетті, не болып жатқанын түсінбедік. Кейін оның жұмыстан кетуге итермеленіп жатқанын естідік. Қазір өзімізді қолға алып, Әлібектің адамдарға деген сенімін қайта қалпына келтіруге тырысып жатырмыз. Бұдан артық айта алмаймын. Осындай жағдайда қалай өмір сүруге болады? Бір адам жылдар бойы қалыптасқан жүйені бұза салуы мүмкін бе? Онымен жеке сөйлескенде, тірі адаммен емес, сезімсіз механизммен сөйлескендей болдым. Ол біздің елге жақында ғана келген, инклюзивті қоғам туралы түсінігі жоқ. Аутизмі бар адамдардың өзгелермен тең дәрежеде жұмыс істей алатынын естімеген де», – деп жазды ол.
Өз кезегінде Burger King Kazakhstan әлеуметтік желідегі жазбаға қатысты ресми мәлімдеме жасады.
«Біздің Dostyk Plaza сауда орталығындағы мейрамханамыздың бұрынғы қызметкеріне қатысты жарияланымды көрдік. Ең алдымен, бұл жағдай отбасы үшін ауыр тигеніне шын жүректен өкініш білдіреміз. Әрбір қызметкер өзін құрметтелген, қолдаулы әрі қауіпсіз ортада сезінуі біз үшін маңызды. Burger King Kazakhstan тең мүмкіндік пен инклюзивтілік қағидаттарын ұстанады», – делінген компания хабарламасында.
Компания өкілдері ішкі тексеріс басталғанын және Әлібектің жұмыстан шығарылмағанын мәлімдеді.
Алайда желі қолданушылары компания жауабына қанағаттанбаған сыңайлы. Әлеуметтік желілерде теріс пікірлер көбейіп, кейбір азаматтар желіні бойкоттауға шақыруда.
