Дәл қазіргі сәтте Қазақстан даму жолында аса маңызды кезеңді басынан өткеруде. Қазақстан Республикасының Президенті ұсынған конституциялық реформалар мемлекеттік жүйені жаңғыртуға, демократия діңгегін нығайтуға, әділ және ашық басқаруды дамытуға деген баршамыздың талап-тілегімізді айғақтайды. Конституция әрқашан қоғамдық өмірдің негізі болды және солай болып қала береді. Ол азаматтардың құқықтары мен бостандықтарын бекітеді, басқару қағидаттарын анықтайды және елдің дамуының ұзақ мерзімді бағыттарын белгілейді. Сондықтан, негізгі заңға енгізілген кез келген өзгерістің маңызы ерекше және ол тек саяси салаға ғана емес, қоғамның әлеуметтік, экономикалық және гуманитарлық салаларына да әсер етеді.
Осындай өзгерістерді көздейтін реформа 2026 жылдың 15 наурызына жоспарланған жалпыұлттық референдумда талқыға ұсынылып жатыр. Бұл азаматтарға деген сенімді көрсетеді және ел болашағы халықтың тікелей қатысуымен айқындалатынына дәлел. Референдум әрбір қазақстандық үшін ұстанымын білдіруге және мемлекеттің одан әрі дамуына үлес қосуына мүмкіндік береді. Менің ойымша, бұл реформалар заң, азаматтардың құқықтары және үкіметтің жауапкершілігі басты орында тұратын жаңа мемлекет құруға деген ұмтылыстың белгісі. Бұл жай ғана құқықтық құжатқа өзгеріс енгізу емес. Ол – мемлекеттік институттардың тиімділігін арттыруға және қоғамның әр мүшесі өзін белсенді және құнды сезінуін қамтамасыз етуге бағытталған қадам. Сол себепті де реформаларды сарапшылардың, ғылыми қауымдастық өкілдерінің және мүдделі азаматтардың қатысуымен жария және ашық талқылаудың маңызы зор. Бұл үкіметтің халықты тыңдап, өзгерістердің қажеттілігін түсініп отырғанын айғақтайды.
Ғылым және денсаулық сақтау саласында еңбек ететін адам ретінде, еліміздің тарихында алғаш рет жаңа Конституция жобасында адами капиталды, білім беруді, ғылымды және инновацияны дамытуға мемлекеттік қызметтің стратегиялық бағыттары ретінде баса назар аударылғанына аса қуаныштымын. Бұл қағидаттарды Негізгі Заңда бекіту ғылыми зерттеулерді қолдау, білім беру жүйесін нығайту және заманауи технологияларды енгізу үшін берік құқықтық негіз жасайды. Бұл әсіресе қоғамдық денсаулық сақтау мен елдің ілгерілеуімен байланысты күрделі мәселелерді шешу жолында күн сайын еңбек ететін ғылыми және медициналық мекемелер үшін аса маңызды. Конституцияда ғылым мен білімнің маңызын көрсету арқылы Қазақстанның болашағын қалыптастыруда білімге, инновацияға және әрбір азаматтың кәсіби әлеуетін дамытуға арқа сүйейтінін байқатады.
Сонымен қатар, жаңа Конституция құқықты шектеу мен оны жүзеге асыру кезінде адам құқықтары мен бостандықтарын, соның ішінде азаматтардың денсаулығына қамқорлықты қорғауды басым бағыт ретінде күшейтеді, сондай ақ адамның қадір-қасиеті мен жеке басына қол сұқпауды құрметтеуге берілетін кепілдіктерді нығайтады.
Президенттің елді жаңартуға және жаңғыртуға бағытталған саясаты Қазақстанның ең алдымен адамға бағытталған, тұрақты, бәсекеге қабілетті мемлекет ретінде дамуына жағдай жасайды. Бұл мемлекеттік мекемелерде жұмыс істейтін және болып жатқан өзгерістердің азаматтардың өміріне қалай әсер ететінін күн сайын көзімен көріп жүрген бәріміз үшін маңызды. Мен қолға алынған реформаларды қолдаймын және оларды аса маңызды қадам деп бағалаймын. Бұл – ғылымды, білімді дамытуды және азаматтардың денсаулығына қамқорлық жасауды мемлекеттік саясаттың ажырамас бөлігіне айналдырған әділетті, қуатты және жаңа Қазақстанға апаратын жол.
ҚР ҰФҒО директоры — Мәлік Әденов
