Дәурен Абаев: Жаңа Конституция орыс тілінің мәртебесін сақтайды
Қазақстанның Ресейдегі елшісі Дәурен Абаев референдумда қабылданған жаңа Конституция елде орыс тілі мен орыстілді азаматтардың құқықтарын қорғау бағыты жалғасатынын мәлімдеді. Сондай-ақ ол Қазақстанның Ресей үшін сенімді әрі тұрақты серіктес болып қала беретінін атап өтті, деп хабарлайды Tarazy.kz
Абаевтың сөзінше, Конституция мәтінінің қазақ және орыс тілдерінде бірдей заңды күшпен жариялануы – мемлекет тарапынан орыс тілі мен орыстілді халықты қорғауға деген ұстанымның нақты дәлелі.
«Қазақстан халықаралық аренада Ресейдің сенімді әрі болжамды серіктесі болып қала береді. Елімізде орыс тілінің жоғары мәртебесі сақталады. Президент Қасым-Жомарт Тоқаев атап өткендей, Конституцияның қазақ және орыс тілдерінде тең заңды күшке ие болуы – мемлекетіміздің осы бағыттағы дәйекті саясатын көрсетеді», — деді елші.
Ол сондай-ақ жаңартылған Конституция адам құқықтарын қорғауға басымдық беретінін және елдің ұзақ мерзімді дамуына негіз қалайтынын айтты.
Бұдан бөлек, Абаев референдумды бақылауға қатысқан Ресей тарапына алғыс білдірді.
Айта кетейік, жаңа Конституцияны қабылдау жөніндегі референдум Қазақстанда 15 наурызда өтті. Оның ресми қорытындылары 17 наурызда жарияланды.
