Алматыда 2026 жылғы 1 мамырдан бастап жылу энергиясы мен ыстық су тарифтері өзгерді, деп хабарлайды Tarazy.kz
Тиісті өзгерістер ҚР Ұлттық экономика министрлігі Табиғи монополияларды реттеу комитетінің Алматы қаласы бойынша департаменті басшысының 2026 жылғы 22 сәуірдегі бұйрығымен енгізілген.
Жаңа тарифтер «Алматы жылу жүйесі» ЖШС-нің жылу энергиясын беру, бөлу және жабдықтау қызметтеріне қатысты бекітілді.
Атап айтқанда, халық үшін жылу тарифі 7503,35 теңгеден 7878,51 теңгеге дейін өсті (ҚҚС-сыз).
Ал жылу энергиясын есептейтін жалпыүйлік құралдары жоқ тұрғындар үшін тариф 9004,01 теңгеден 9454,21 теңгеге дейін көтерілді.
Жалпыүйлік жылу есептегіш құралдары бар тұрғындар үшін тариф 7364,88 теңгенің орнына 7733,12 теңге болды.
Сонымен қатар ыстық су тарифтері де өзгерді. Жылу есептегіш құралдары жоқ, орталықтандырылған ыстық сумен жабдықталған көпқабатты үйлерде бір адамға шаққандағы төлем 2031,47 теңгені құрады (ҚҚС-сыз).
Жеке есептегіш құралдары бар тұрғындар үшін ыстық судың бір текше метрінің тарифі 588,81 теңге болып белгіленді.
Сондай-ақ апатты және ескі үйлерде тұратын, техникалық мүмкіндік болмағандықтан жалпыүйлік есептегіш орнатылмаған тұтынушылар үшін де жеке тарифтер бекітілген.
Бұйрық қол қойылған күннен бастап күшіне енді.
