Қазақстанда Президент Қасым-Жомарт Тоқаевтың әр жылдары айтқан маңызды сөздері мен баяндамаларынан құралған «Әділетті қоғамға – шыншыл сөз» атты кітап жарық көрді, деп хабарлайды Tarazy.kz
Жинаққа Мемлекет басшысының 1994 жылдан бергі архивтік материалдары мен соңғы жылдардағы сөздерінен іріктелген үзінділер енгізілген. Басылымда Президенттің Қазақстанда және халықаралық алаңдарда айтқан негізгі тезистері қамтылған.
Кітап материалдары 21 тақырыптық бөлімге бөлінген. Онда заң үстемдігі, қоғамдық қауіпсіздік, мемлекеттік басқару, білім беру, жастар саясаты, цифрландыру, ұлттық бірегейлік, экологиялық мәдениет және «Таза Қазақстан» бастамасы сияқты бағыттар қамтылған.
Жинақ мемлекеттік қызметшілерге, оқытушыларға, студенттерге, жас мамандарға, зерттеушілерге және Қазақстанның қазіргі тарихына қызығушылық танытатын оқырмандарға арналған.
Жақын уақытта кітаптың таралымы қоғамдық кітапханаларға, жоғары оқу орындарына, колледждерге, саяси партияларға және жастар ресурстық орталықтарына жолданады.
