Қазақстанда бензин мен дизель отынына салынатын акцизді есептеу тәртібі өзгерді. Өзгеріске сәйкес акциздің өзгермелі бөлігін есептеу кезінде қолданылатын коэффициент 50 пайыздан 95 пайызға дейін көтерілді. Жаңа тәртіп 1 қыркүйектен бастап туындаған құқықтық қатынастарға қолданылады, деп хабарлайды Tarazy.kz
Жаңа механизм бензиннің көтерме бағасы тоннасына 214 584 теңгеден асқан кезде іске қосылады. Дизель отыны үшін бұл шек тоннасына 284 350 теңге болып белгіленген. Баға белгіленген шектен қаншалық жоғары болса, акциз сомасы да соғұрлым көбейеді.
Өзгеріс жанармай өндірушілердің көтерме саудасына, отын импортына және давальдық шикізатты өңдеу нәтижесінде алынған өнімдерді беруге қатысты болмақ. Сондай-ақ, коэффициент өндірушілердің бөлшек сауда мен отынды өз өндірістік қажетіне пайдаланған кезде де 95 пайызға дейін көтерілген.
Бұл ретте жанармайдың баға шектері мен негізгі акциз мөлшерлемелері өзгерген жоқ. Бензинді өндіруші бөлшек саудада сатқан кезде негізгі мөлшерлеме — тоннасына 38 634 теңге. Дизель отыны үшін көтерме саудадағы мөлшерлеме — 35 726 теңге, бөлшек саудада бұл — 35 786 теңге.
Акциз коэффициенті өсуі жанармай бағасына әсер ете ме, жоқ па, оны нарықтағы нақты баға мен өндірушілердің шығыны айқындайды.
