Жамбыл облысындағы әскери бөлімде қайтыс болған сарбаздың өліміне күдікті ретінде ұсталған Айболат Аманжоловтың отбасы аштық жариялады, — деп хабарлайды azh.kz.
Аманжолов тұтқындалғаннан кейін ата-анасы баласын көре алмаған. Алты баласы бар ата-ана Атырау облыстық Қорғаныс істері жөніндегі департаменттің алдына жиналған. Олардың айтуынша, баласын ешқандай ескертусіз Қордай аудандық полициясынан Алматыдағы тергеу изоляторына алып кеткен.
«Ұлымды Алматыдағы тергеу изоляторына ауыстырды, бұл туралы ешкім білмеді. Тіпті адвокат білмейді. Қазір ұлымыздың тірі немесе өлі екенін білмейміз. Оны біреу қорқытуы мүмкін. Оған заңды өкілдермен кездесуге рұқсат етілмесе, онда бір нәрсе дұрыс емес деген сөз!» — дейді солдаттың анасы Айнұр Төлемісова көзіне жас алып.
Айнұр Төлемісованың айтуынша, ұлымен бірге әскерге кеткендер ант қабылдап, қызметке кіріскен.
Солдаттың анасы бұған дейін Айболаттың бұл оқиғаға қатысы жоқ деп мәлімдеме бергендер енді өз айғақтарын өзгертіп жібере ме деп қорқады.
«Ант қабылдағаннан кейін балаларға басшылық тарапынан қысым болатынына сенімдімін. Ұлым тергеу изоляторында, оның қасына бұрын қылмыс жасаған әрі 10 жыл түрмеде отырған ер адамды отырғызған. Ол менің ұлыма барлық кінәні өз мойнына алуға кеңес берген. Демек, ол да әскери тергеушілердің адамдары», — дейді сарбаздың анасы.
Аштық жариялаған солдаттың ата-анасы, зейнетке шыққан әжесі, ағалары мен әпкелері Айболатты Атырауға әкелгенше, Департамент алдында соңына дейін отыруға ниетті.
«Қылмыстық іс туралы ақпарат жоқ. Ұлым әлі әскери қызметкер емес, сондықтан оны Атыраудағы тергеу изоляторына ауыстыруға болады деп ойлаймын. Аштық жариялауды оны Атырауға әкелген кезде ғана тоқтатамыз», — дейді Айнұр Төлемісова.
Атырау облысы Қорғаныс департаменті бастығының орынбасары Ержан Жұмановтың айтуынша, Айболат Аманжолов барлық медициналық және психологиялық сынақтан сәтті өткен.
«Оның жеке ісін сұратты. Бізде бар құжаттарды жібердік. Ол медициналық және психологиялық сынақтардан сәтті өтті. Полиция есебінде тұрмаған. Қазір тергеу жүріп жатыр», — деді Ержан Жұманов.
Айта кетейік, маңғыстаулық сарбаз әскерге шақырылғанына бірнеше күн өткенде қайтыс болды. Оқиға Жамбыл облысы Қордайда болған. 22 сәуірде Мерзімді қызметтің қатардағы жауынгері Әлібек Қалбай Гвардейский кентіндегі қалалық типтегі әскери ауруханада қайтыс болды. Маңғыстау облысы Ақшұқыр ауылының тұрғыны 18 жастағы Әлібек Қалбайдың туыстарының сөзінше, ол 13 сәуірде шақырту алып, ҚР Қорғаныс министрлігінің 30212 әскери бөліміне әскери борышын өтеуге барған. Бөлімше Жамбыл облысы Қордай ауылында орналасқан. Туыстары бұл оқиға әділ тергелетініне үміттенеді.
Еске салайық, бұған дейін Жамбыл облысындағы сарбаздың өліміне күдікті анықталғаны хабарланған болатын.
