Нұржігітов: Мемлекет басшысының тапсырмаларын нәтижелі жүзеге асыруға тиіспіз

0

Жамбыл облысының әкімі Нұржан Нұржігітовтің төрағалығымен өткен кеңесте Мемлекет басшысы Қасым-Жомарт Тоқаевтың «Әділетті Мемлекет. Біртұтас ұлт. Берекелі қоғам» атты Қазақстан халқына Жолдауындағы міндеттер мен тапсырмаларды жүзеге асыру барысы талқыланды.

Айта кетейік, ҚР Үкіметімен Президент Жолдауын іске асырудың Жалпыұлттық іс-шаралар жоспары бекітілген болатын. Ол жоспарды 5 негізгі бағыт бойынша іске асыру экономиканы сапалы дамытуға және халықтың әл-ауқатын арттыруға мүмкіндік береді деп көзделуде.

Басқосуда аймақ басшысы Жолдаудың әр бағытына жеке-жеке тоқталып, өңірде атқарылуы тиіс жұмыстарды нақтылап, жауаптыларға тиісті міндеттер жүктеді.

– Мемлекет басшысының Жолдауын нәтижелі жүзеге асыру – басты міндет! Жолдаудағы жаңа экономикалық саясат, нақты секторды дамыту мен бюджет саясатына қатысты тапсырмаларды өңірде жүзеге асыру бойынша ұсыныстар әзірлеу қажет. Бұл мәселені экономика басқармасы үйлестіруі тиіс.

Еңбекақы төлеу қорын көбейткен және салық төлемдерін арттырған кәсіпорындарға қолдау көрсету маңызды. Аталған тапсырманы өңірде жүзеге асыру бойынша кәсіпкерлік басқармасы ұсыныс әзірлеуі керек.

Сондай-ақ, шағын және орта бизнес субъектілері санының артуына жағдай жасауға міндеттіміз. Облыстың бекітілген даму жоспарына сәйкес ағымдағы жылы орта кәсіпкерліктің үлесі 8,3 пайызға орындалуы қажет.

«Бастау Бизнес» жобасы шеңберінде оқудан кейін жеке ісін ашқан азаматтардың үлесінің артуын назарға алыңыздар.

Жолдауда кәсіпкерлерге жер телімдерін ашық әрі жедел бөлудің тиімді тәсілдерін айқындап, оны жыл соңына дейін әзірлеу, әрбір аймақ пен елді мекенде бос жатқан немесе мақсатына сай игерілмеген жердің бар-жоғын анықтау тапсырылды. Осы орайда облыстық жер қатынастары мен аудан әкімдері игерусіз жатқан жерлерді мемлекетке қайтару бойынша шара қабылдауы керек. Сондай-ақ, ағымдағы жылы қосымша елді мекен жайылымын ұлғайту үшін 418,4 мың гектар жер учаскесін қосып беру жұмыстарын толық аяқтауға тиіс,-деді Нұржан Нұржігітов.

Облыс әкімі жеке тұрғын үй құрылысы үшін берілетін жер телімдерінің тиімді игерілуіне аса назар аударды.

– Біз жеке тұрғын үй құрылысы үшін берілетін жер телімдерін инженерлік-коммуникациялық инфрақұрылым желілерімен қамтуға айрықша назар аударып отырмыз. Кезекте тұрғандарға 3198 жер телімін тарату жоспарлануда.

Дегенмен, бұған дейін берілген жер телімдері бойынша әлі күнге ешқандай құрылыс жұмыстары басталмағандығы, бір қолдан екінші қолға сатылу секілді фактілер жиі кездеседі. Мұндай келеңсіздіктер бойынша тексеріс жүргізіліп, талап күшейеді.

Тиісті мерзім ішінде құрылыс басталмайтын болса, біз жер телімдерін тарату жұмыстарын тоқтатуға тиіспіз,-деді аймақ басшысы.

Нұржан Нұржігітов Жолдаудағы «Нақты секторды дамыту», «Ел болашағына арналған стратегиялық инвестиция», «Мемлекеттік басқару ісін қайта жаңғырту», «Заң және тәртіп» секілді бағдарларға да арнайы тоқталып, барлық салаларда нәтижелі жұмысты қамтамасыз ету үшін тиісті тұлғаларға  тапсырмалар берді.

Жиында Жолдаудан туындайтын міндеттерді жүзеге асыру бойынша өңірлік іс-шаралар жоспарын әзірлеу керектігі баса айтылып, облыс әкімінің орынбасарларына өз салалары бойынша бақылау жүктелді.

Кеңестің күн тәртібіндегі екінші мәселе ретінде жылыту маусымына дайындық барысы қаралды. Аймақ басшысы әлеуметтік нысандар мен көпқабатты үйлердің дайындықтарына қатысты жан-жақты жауаптар  алып, барлық жұмыстар 1 қазанға дейін толығымен аяқталуы тиіс екендегін ескертті.

Оставьте ответ

Ваш электронный адрес не будет опубликован.