Жамбыл облысында жастардың кітапқа деген қызығушылығын арттырып, интеллектуалды әлеуетін көтеруге бағытталған «Әулиеата — кітап оқитын өңір» жобасы қарқынды дамып келеді. Соның ең жарқын бастамаларының бірі – биыл алғаш рет ұйымдастырылған «Ой шебері» зияткерлік ойыны. Шара Жамбыл облыстық «Мөлдір бұлақ» оқу-сауықтыру орталығында өтті және мыңдаған жасқа жаңа мүмкіндік сыйлады.
Бұл жоба өңірдің мәдени-рухани өмірінде ерекше орын алуда. Оның басты мақсаты – интеллектуалды ортаны қалыптастыру, жастардың кітапқа деген қызығушылығын күшейту, ой-өрісін кеңейту және шығармашылық әлеуетін дамыту. «Әулиеата — кітап оқитын өңір» аясында осы уақытқа дейін «Оқушылар лигасы», «Дарынды мектептер лигасы» және «Техникалық және кәсіптік білім беру ұйымдары лигасы» бойынша 15 ойын өткізіліп, 400 команда, шамамен 2000 кітап қамтылды. Бұл көрсеткіш жастардың білімге деген құштарлығы артып келе жатқанын көрсетеді.
Зияткерлік сайыс ерекше форматымен де көзге түсті. Қатысушыларға әртүрлі тақырыптарды қамтитын сұрақтар, логикалық тапсырмалар және танымдық сауалдар ұсынылды. Барлық ойындар әділ әрі ашық өтті. Жастар білімін сынап қана қоймай, жаңа тәжірибе жинақтап, логикалық ойлау қабілетін дамытты. Сайыс барысында достық пен серіктестік ахуалы ерекше сезілді. Бұл ойындар жастар арасындағы мәдени және рухани байланыстарды нығайтып, оларды бір-бірімен жақындата түсті.
«Ой шебері» ойыны уақыт өте мазмұнын кеңейтіп, жаңа әдістемелік бағыттармен толықтырылуда. Қарапайым білім жарысы ғана емес, жас буынның креативті ойлау қабілетін жетілдіретін алаңға айналды. Жоба кітап оқу мәдениетін дәріптеуде және білімге құштар жастардың қатарын көбейтуге бағытталған.
Ойындар үш түрлі лига бойынша ұйымдастырылды.
Оқушылар лигасы – жалпы орта білім беру ұйымдарының оқушылары үшін өткізілді. Жыл бойы өткен 11 ойында жүздеген команда бақ сынап, тек үздіктер ғана гранд финалға жолдама алды. Бастапқыда 350-ден астам команда жарысқа қатысып, финалға ең мықты 11 топ қана шықты. Олар 2 миллион теңгелік жүлде қорына таласу үшін күресті. Гранд финалға қатысушыларға алдын ала 20 түрлі кітап ұсынылып, солар бойынша сұрақтар дайындалды.
Финалда бақ сынаған командалар қатарында:
Меркі ауданынан – Сыпатай Әлібекұлы атындағы №19 орта мектебі;
Тұрар Рысқұлов ауданынан – Құлан тірек мектеп-гимназиясы;
Мойынқұм ауданынан – Шығанақ орта мектебі;
Сарысу ауданынан – Мұхтар Әуезов атындағы мектеп-гимназиясы;
Жамбыл ауданынан – Мұхтар Әуезов атындағы орта мектебі;
Талас ауданынан – Ахмет Байтұрсынұлы атындағы гимназия;
Жуалы ауданынан – Әлихан Бөкейхан атындағы №15 тірек мектеп-лицейі;
Байзақ ауданынан – Нығметулла Киікбаев атындағы мектеп-гимназиясы;
Шу ауданынан – Абай атындағы орта мектебі;
Тараз қаласынан – №15 мектеп-гимназиясы және №23 орта мектебі.
Айта кетерлігі, финалда екі Мұхтар Әуезов атындағы мектеп және екі №15 мектеп кездесті – бұл да білім додасындағы қызықты сәттердің бірі болды.
Дарынды мектептер лигасы да ерекше тартысты өтті. Бұл бағытқа облыстың мамандандырылған мектептерінен 20 команда өтініш беріп, олардың ішінен үздік 11 топ ақтық сынға жетті. Қатысушылардың әрқайсысы 16 кітап оқып дайындалды. Жүлде қоры – 1,2 млн теңге болды. Үш кезеңнің нәтижесі қосылып, жеңімпаздар анықталды:
3 орын – Абай атындағы дарынды балаларға арналған қазақ тілі мен әдебиетін тереңдете оқытатын мектеп-гимназиясының «Тастүйін» тобы (300 000 тг)
2 орын – «Дарын» лицей-интернатының «Самұрық» тобы (400 000 тг)
1 орын – «Білім-инновация» лицей-интернатының «Руханият» тобы (500 000 тг және «Ой шебері» кубогы).
Жеңімпаздарды Жамбыл облысы әкімдігінің білім басқармасы жанындағы «Жамбыл дарыны» орталығының директоры Майра Есеналиева марапаттады.
Техникалық және кәсіптік білім беру ұйымдары лигасы да биыл жастардың белсенді қатысуымен өтті. Бұл лигаға 25 команда қатысып, ішінен үздік 13 топ финалға жетті. Жүлде қоры – 1,2 млн теңге. Қатысушылар 15 кітап оқып дайындалды. Қорытындысында:
3 орын – Қордай ауданының «Береке» колледжінің тобы (300 000 тг)
2 орын – Жамбыл медициналық жоғары колледжі (400 000 тг)
1 орын – Абай атындағы Жамбыл гуманитарлық жоғары колледжі (500 000 тг және «Ой шебері» кубогы).
Финалдық бәсекенің тағы бір жаңалығы – сұрақтарды әзірлеуде жасанды интеллект қолданылуы. Бұл ойынға жаңа технологиялық сипат беріп, қатысушыларға жаңа тәжірибе сыйлады. Сонымен бірге шараға «Жамбыл даму» қоры, «Жамбыл Тараз» газеті және «Әулиеата ТрансПасс» компаниясы демеушілік көрсетті.
Гранд финал қорытындысы да ерекше тартысты болды. Үш команда тең ұпай жинап, шешуші сәтте командалардың жетекшілері блиц-сауалдарға жауап беріп, жүлделі орындар сол арқылы анықталды:
3 орын – Әлихан Бөкейхан атындағы №15 тірек мектеп-лицейі (Жуалы ауданы) – LENOVO ноутбугі (5 дана)
2 орын – Құлан тірек мектеп-гимназиясы (Тұрар Рысқұлов ауданы) – iPad планшеті (5 дана)
1 орын – Нығметулла Киікбаев атындағы мектеп-гимназиясы (Байзақ ауданы) – MacBook ноутбугі (5 дана) және алтын медаль.
Жүлдегерлерді марапаттау рәсіміне Жамбыл облысы әкімінің бірінші орынбасары Нұржан Календеров пен облыстық білім басқармасы басшысының орынбасары Ләззат Қызылқұлова қатысты.
Көпшілікті қызықтырған сұрақ – «Бұл жоба келесі маусымда жалғаса ма?» болды. Ұйымдастырушылар бұл бастама облыс әкімі мен білім басқармасының қолдауымен жалғасатынын қуана жеткізді.
«Ой шебері» – жас буынды кітапқа баулу, білімге ынталандыру және интеллектуалды қоғам қалыптастыру жолындағы маңызды бастамаға айналды. Қатысушылардың қуанышы, жастардың қызығушылығы мен демеушілердің қолдауы жобаның болашағы зор екенін көрсетті.
