Енді қазақстандықтар коммуналдық төлемге қарыз болса, шетелге шыға алмауы мүмкін. Себебі жыл басынан бері 165 алматылық осындай берешегі үшін шетелге ұша алмай қалған. Олар жылу ақысын уақытында төлемеген, деп хабарлайды Tarazy ақпарат.
Бұл туралы «Алматы Жылу Жүйесі» мекемесінің баспасөз қызметі ақпарат таратты. Хабарламада алматылықтардың жылу үшін жалпы қарызы 2,1 млрд теңгеге жеткені айтылады. Жыл басынан бері қалада жылу ақысын төлемегені үшін 1610 абонент желіден ажыратылды. Жылу мен ыстық суға қарыз 1212 тұтынушыға заң орындары арқылы шектеу қойылып, 355 банктық есепшот бұғатталған. Ал 165 азаматтың шетелге шығуына тыйым салынды. 
«Қазір күн сайын «Алматы Жылу Жүйесі» мекемесіне қарызы бар тұрғындарды ыстық судан ажыратып жатырмыз. Бір айта кететін жайт, екі немесе одан да көп мерзім төлем жасамаған абонент қарыз болып саналады. Оған төлем жасау қажеттігі туралы тиісті хабарлама да беріледі. Оған құлақ аспаса, мекеме де шара қолдануға мәжбүр«, — деп жазылған мекеме таратқан ақпаратта.
Коммуналдық қызмет өкілдерінің айтуынша, мұндай қадамға мәжбүрлі түрде баруда. Себебі төлем жасалмаса, келесі жылыту маусымына дайындық тиісті мөлшерде жүргізілмей, жұмыс барысына кедергі болады. Тіпті, коммуналдық мекеменің шығымы бойынша төлем жасамай жүргендердің көлік, тұрғын үй сияқты жеке мүліктері де сот арқылы бұғатталып, ол азаматтарға өзге қаржылық операцияларды жасауға да шектеу қойылуы мүмкін екен.
