Астанада жол қозғалысын 2017 жылдан бері жұмыс істеп келген «Сергек» бейнебақылау жүйесінің қызметі тоқтайтын болды. Осы жылдың 13 наурызынан бастап елордадағы бейнебақылау жүйесі G42 холдингіне кіретін Presight компаниясына берілмек деп хабарлайды Tarazy ақпарат.
Аталған жаңа жүйе БАӘ-де тіркелген компанияға тиесілі. Инвестиция көлемі – 53 миллиард теңге. Жобаны толықтай жеке инвестор қаржыландырады.
Елорда мәслихатының кезектен тыс сессиясында Астана қаласы Цифрландыру және мемлекеттік қызмет басқармасының басшысы Дидар Сүлейменов «Сергектің» кемшіліктерін атап өтті және жаңа жүйеге өту процесін қолдады.
2017 жылдан бері жұмыс істеп келген «Сергек» жобасы тиесілі «Көркем Телеком» компаниясымен 13 наурызда келісімшарт мерзімі аяқталмақ. Мемлекет басшысының тапсырмасы аясында және жобаны одан әрі дамыту тұрғысында G42 холдингіне кіретін Presight халықаралық компаниясымен елорда үшін жасанды интеллект негізінде қалалық инфрақұрылымды басқарудың жобалық шешімін іске асыру жұмысын атқардық. Жаңа жобаны қалыптастыру кезінде қазіргі қолданыстағы жүйенің кемшіліктері ескерілді. Жаңа жоба бейне түсірілім ағынын таратудың бірыңғай жүйесін қамтамасыз етеді. Қазіргі инфрақұрылым жаңа жеке серіктестің басқаруына беріледі, бұл қазіргі жүйенің үздіксіз жұмыс істеуін қамтамасыз етеді. Жобада 22 мың жалпы бейнебақылау камерасы, қиылыстарда 732 аппараттық-бағдарламалық кешен, желілік учаскелерде 470 аппараттық-бағдарламалық кешен, сонымен қатар бейне талдаудың 35 түрі қарастырылған. Жоба аясында деректерді өңдеу орталығы ұйымдастырылып, кез келген оқыс оқиғаға жедел әрекет ету үшін жедел коммуналдық қызметтерді біріктіретін бірыңғай ситуациялық орталық қамтамасыз етіледі, — деді басқарма басшысы.
Басқарма басшысының сөзінше жұмыстың 60%-ын қазақстандық компаниялар орындайды. Жүйе толық іске қосылғаннан кейін ғана инвесторға төлем жүргізілетін болады. Жоба 2030 жылға дейін жоспарланған.