Алматыда 14 жылдан бері алғаш рет биік таулы «Медеу» спорт кешеніне апаратын автомобиль жолы жөнделді. Жұмыс қала әкімі Ерболат Досаевтың тапсырмасымен қолға алынған еді, деп хабарлайды Tarazy ақпарат.
Қаланың ең басты көрікті жерінің бірі саналатын «Медеуге» апаратын Керей мен Жәнібек хандар көшесіне жаңа асфальт төселіп, жол белгілері және жаяу жүргіншілерге арналған қауіпсіз тротуарлар орнатылды. Ұзындығы 10 шақырым болатын жол бөлігіне ыстық пен суыққа төзімді әрі тозу процесін баяулататын полимерасфальтбетон төселді. Бұл материалдың қызмет ету мерзімі де ұзағырақ. Сонымен қатар, 14 шақырым жаяу жүргіншілерге арналған жаңа тротуарлар салынды. Жүргізушілердің қауіпсіздігі үшін 37 «қалқымалы» люк орнатылды.
Барлық жөндеу жұмыстарын «Жол активтерінің ұлттық сапа орталығы» мамандары қадағалап, тиісті сынамалар алды. Жол төсеу технологияларын жіті бақылап, құрылыс материалдарын тексерді. Мекеменің Алматы қалалық филиалының инженері Мейіржан Мырзахметтің айтуынша, жол жөндеу жұмыстары кезінде барлық талаптар қатаң сақталған.
«Жөндеу жұмыстарын Asmar Stroy ЖШС жүзеге асырды. Аталған нысанға біздің филиал 10 рет тексеріске шықты. Жол төсеу барысында асфальтбетон қоспасынан 6 сынама, төселіп болған соң 36 керн сынамасы алынды. Асфальтбетон қоспасы талапқа сай болды. Ал керн сынамалары зертханада тексеріліп жатыр,» — деді филиал инженері.
