Қазақстанда мемлекеттік қарызды басқару жөніндегі кеңес құрылды, деп хабарлайды Tarazy.kz
Бұл қарыз алу саясаты мен мемлекеттік бағалы қағаздар нарығын дамыту саласындағы шешімдерді үйлестіруге арналған жаңа консультативтік-кеңесші орган, деп хабарлады Қазақстан Республикасының Ұлттық банкі.
Кеңес макроэкономикалық жағдай мен қарыз тұрақтылығына қойылатын талаптарды ескере отырып, мемлекеттік қарызды басқару бойынша келісілген тәсілдерді қалыптастыру алаңы болмақ.
Органның негізгі міндеттерінің қатарында бюджет тапшылығын жабу үшін мемлекеттік қарыз алу құнын төмендету, мемлекеттік бағалы қағаздардың ішкі және сыртқы нарықтарын дамыту, сондай-ақ квазимемлекеттік сектор мен корпоративтік эмитенттер үшін кірістілік бағдарларын қалыптастыру бар. Сонымен қатар мемлекеттік бағалы қағаздар нарығының тереңдігі мен өтімділігін арттыруға ерекше көңіл бөлінеді.
Ұлттық банкте кеңестің құрылуы фискалдық және ақша-несие саясатын неғұрлым тығыз үйлестіру бағытын көрсететінін атап өтті.
