Павлодар қаласының тұрғыны туған әпкесіне тиесілі зергерлік салоннан Т164 млн көлемінде тауар ұрлап, 7 жылға бас бостандығынан айырылды, деп хабарлайды Tarazy.kz
Павлодар қаласының қылмыстық істер жөніндегі мамандандырылған ауданаралық сотының үкіміне сәйкес, К.С. ҚР Қылмыстық кодексінің 189-бабы 4-бөлігі 2-тармағы (сеніп тапсырылған бөтен мүлікті аса ірі мөлшерде иемдену немесе ысырап ету) бойынша кінәлі деп танылды.
«К.С.-ны кінәлі деп танып, 7 жыл мерзімге бас бостандығынан айыру жазасы тағайындалсын. Жазасын орташа қауіпсіздік мекемесінде өтесін. ҚР ҚК 74-бабы 1-бөлігі негізінде жазаны өтеу 2 жылға кейінге қалдырылсын», – делінген сот үкімінде.
Қосымша жаза ретінде сотталған әйел 5 жыл мерзімге материалдық жауапкершілікке байланысты коммерциялық ұйымдарда қызмет атқару құқығынан айырылды.
Сот материалдарына сәйкес, айыпталушы 2023 жылы құмар ойындарға әуестенгеннен кейін әпкесіне тиесілі зергерлік салоннан тауар ұрлай бастаған. Бірнеше ай ішінде ол дүкеннен алтын және күмістен жасалған 669 түрлі бұйымды – алқа, сырға, білезік, жүзік, брошь және басқа да әшекейлерді алып шыққан.
Ең қымбат бұйым – құны 1 млн теңгеден асатын «Бисмарк» өріміндегі алтын шынжыр болған. Ұрланған зергерлік бұйымдарды әйел ломбардтарға өткізіп отырған. Жетіспеушілік кезекті түгендеу барысында анықталған.
Келтірілген материалдық шығын көлемі 164 млн теңгені құрады.
Айыпталушы 2025 жылғы 3 маусымнан 2026 жылғы 6 ақпанға дейін қамауда болған.
Үкім заңды күшіне енген жоқ.
