2026 жылғы 1 маусымдағы жағдай бойынша қазақстандықтардың банктер алдындағы жалпы берешегі 25,48 трлн теңгеге жетті. Бұл туралы Ұлттық банктің аналитикалық шолуында айтылған, деп хабарлайды Tarazy.kz
Мәліметке сәйкес, қарыздардың басым бөлігін тұтынушылық несиелер құрайды. Қазақстандықтар тұтынушылық мақсаттарға 17,08 трлн теңге көлемінде несие алған. Бұл жалпы берешектің шамамен 67 пайызы.
Ал ипотекалық несиелердің көлемі 7,32 трлн теңгеге жеткен. Бұдан бөлек, өзге мақсаттарға берілген несиелердің жалпы сомасы 1,08 трлн теңгені құрайды.
Өңірлер бойынша ең көп несие Алматы қаласының тұрғындарына тиесілі. Мегаполис тұрғындарының банк алдындағы берешегі 7,54 трлн теңгеге жеткен.
Екінші орында Астана қаласы тұр. Елорда тұрғындарының несиесі 4,17 трлн теңгені құраса, үшінші орында Шымкент қаласы орналасқан. Бұл қаладағы несие көлемі 2,03 трлн теңгеге жеткен.
