Облыстың бас санитарының 2020 жылдың 18-ші мамырдағы №20 қаулысына сәйкес жұмыс істеуіне рұқсат берілген құрылыс материалдарын сатушы сауда орындарында санитарлық талаптардың орындалуы және заңсыз ашқан сауда нысандарын қадағалау мақсатында Тараз қаласы әкімдігінің кәсіпкерлік, өнеркәсіп және туризм бөлімінің мамандарымен «Ауыл Береке», «Бек» және «Яка Сарай» базарлары, сондай-ақ, Ташкент көшесінде орналасқан құрылыс материалдарын сататын сауда нысандары және «Жібек жолы» базары жұмыстарына мониторинг жүргізілді.
Мониторинг нәтижесінде «Ауыл Береке», «Бек» және «Яка Сарай» базарлары санитарлық талаптарды сақтай отырып, киім-кешек және басқа да тауарлар сататын халық көп жиналатын бөлімдерін ашпай жұмыс істеуі байқалды.
Ташкент көшесі бойындағы бірнеше сауда нысандары араланды. Олардың ішінде санитарлық талаптарды бұзған (антисептик, маска, санқолғап жоқтығы) 15 құрылыс материалдарын сатушы сауда нысандары әшкереленіп, алдағы уақытта мұндай жағдайлар қайталанбауы жөнінде ескерту берілді.
Мониторинг жұмысының соңында «Жібек жолы» базарының жұмысы бақыланды. Бақылау барысында базар аумағында рұқсат берілген құрылыс материалдарының орындарымен бірге киім-кешек, аяқ киім сияқты уақытша тыйым салынған орындардың жұмыс істеп тұрғаны анықталды. Анықталған санитарлық талаптардың бұзылуы бойынша базар басшылығына және саудагерлерге ескерту шаралары жасалып, дереу сауда орындарының жабылуы қамтамасыз етілді.
