Қазақстан Республикасы Президенті Қасым-Жомарт Тоқаев бастамасымен республика аумағында жүзеге асырылып жатқан жалпыұлттық «Таза Қазақстан» экологиялық мәдениетті дамыту тұжырымдамасы аясында Орал қаласында салтанатты іс-шара өтті, деп хабарлайды Tarazy.kz
Аталған іс-шараның басты мақсаты – жас ұрпақ арасында тұрмыстық қалдықтарды бөлек жинау, сұрыптау және кәдеге жарату дағдыларын қалыптастыру, сондай-ақ экологиялық білім мен мәдениетті арттыру болды.
Іс-шара барысында EcoQolday цифрлық жүйесін пайдалану арқылы оқушыларға қалдықтарды басқарудың заманауи тәсілдері түсіндірілді. Жоба шеңберінде қаладағы мектептердің оқушыларымен, сынып жетекшілерімен, сондай-ақ білім беру басқармасы қызметкерлерімен кездесулер ұйымдастырылды.
Экологиялық ағартушылық бағыттағы бұл кездесулерді спикерлер – Қисымова Әлима Қисымовна және Оралбекова Назерке Асанқызы өткізді. Бағдарлама аясында қатысушыларға тұрмыстық қалдықтардың қоршаған ортаға әсері, олардың түрлері, қалдықтарды бөлек жинау жолдары және қайта өңдеу мен кәдеге жарату тәсілдері туралы жан-жақты ақпарат берілді. Теориялық біліммен қатар, практикалық дағдыларды қалыптастыруға да ерекше көңіл бөлінді.
Жоба шеңберінде білім беру және материалдық қамтамасыз ету бағыттары да жүйелі түрде іске асырылды. Атап айтқанда, Орал қаласындағы 41 мектеп қамтылып, қалдықтарды бөлек жинау үшін жалпы 246 жинақ контейнер орнатылды. Бұл барлығы 738 дана арнайы контейнердің мектептерге орналастырылуын қамтамасыз етті.
Сонымен қатар, білім беру қамтуы аясында 5665 оқушы арнайы оқытудан өтті. Бұдан бөлек, 827 мұғалімге арналған оқыту семинарлары ұйымдастырылды. Олардың қатарында биология және география пәні мұғалімдері, сынып жетекшілері, тәрбие ісі жөніндегі орынбасарлар, технология пәнінің мұғалімдері мен мектеп директорлары болды. Бұл семинарлар мектептерде қатты тұрмыстық қалдықтарды жинау дағдыларын қалыптастыру және оқушылардың экологиялық жауапкершілігін арттыру жұмыстарын жалғастыруға бағытталды.
«Таза Қазақстан» бастамасы – мектеп оқушыларының қоршаған ортаға ұқыпты қарауын қалыптастыруға, тұрақты тұтыну мәдениетін дамытуға және ұлттық экологиялық күн тәртібін ілгерілетуге бағытталған маңызды жоба. Ұйымдастырушылар бұл бағыттағы жұмыстардың алдағы уақытта да жалғасатынын атап өтті.
Жобаның орындаушысы – Қазақстан экологиялық қоры болды, ал іс-шаралар Қазақстан Республикасы Экология және табиғи ресурстар министрлігі қолдауымен жүзеге асырылды.
