Басшылары бетпердені өздеріне тіктіріп, қауіпті індеттен қорғану құралдарын «үнемде» деп бермеуінің салдарынан коронавирус жұқтырдым деген Меркі аудандық ауруханасының инфекционист дәрігері Толқынай Ордабаеваның басындағы жағдайды Денсаулық сақтау министрі Е.Біртанов жеке бақылауына алғанын айтқанымен, мәселе оңынан шешілудің орнына шиеленісе түскендей.
Олай дейтініміз – кеше Т.Ордабаеваның жұмыс кабинетіне түн жарымында тексеру жүргізіліп, 400 дана бір реттік бетперде және басқа да қорғану құралдарының «табылғаны». Бұл жайында Толқынай кеше түнде әлеуметтік желідегі парақшасында жазған болатын.
Біз бұл бойынша бүгін Толқынайға тағы да хабарластық. Денсаулығы түзеле бастағанын, дене қызуының түскенін айтқан Ордабаева кабинетіне тексерушілердің барып, 400 бетперде мен өзге де қауіпті індеттен қорғану құралдарының табылғаны жөнінде мейірбикеден естіген. Бұл жайында Толқынай: «Менімен бірге карантинде жатқан мейірбикеге тағы бір әріптесіміз менің кабинетімнің кілтін сұраған болып хабарласқан. Әйтпесе, аудандық аурухана дәрігерінің кабинетін ашу оларға сөз болып па? Өздерінше сценарий құрған түрлері ғой. Бар былықтарын әшкерелегеннен кейін менің өзімді жазықты ету үшін жасап жатқан әрекеттері деп білемін. Әйтпесе, менің кабинетіме түннің жарымында топырлап барып, тексеру жүргізбес еді. Аталған 400 бетперде мен басқа да құрал-жабдықтарды өздері алдын-ала апарып қойғандары анық» дейді.
Бұл ретте біз Меркі аудандық ауруханасы бас дәрігердің міндетін атқарушы Данияр Нүсіпбаевтың да пікірін білген едік. Ол Толқынайдың кабинетіне Меркі ауылдық округінің маманы, СЭС қызметкері, аудандық аурухананың бөлім меңгерушілері, мейірбикелер бар тексеру тобы кеше сағат 22:00 шамасында тексеру жүргізуге барғанын растады. Бірақ, құрамында учаскелік инспектордың болмауына байланысты тексеру тоқтатылып, бүгін Ордабаеваның кабинетіне қайта тексеру жүргізіліпті. Тексерушілер Толқынайдың кабинетін тінту кезінде нақты не тапқандарын Нүсіпбаев білмейтінін, ол бойынша дәл қазір қандай да бір мәлімет бере алмайтынын, ақылдасуы қажет екенін айтты. Сол бойы бас дәрігердің міндетін атқарушымен байланыса алмадық.
Осылайша, басшыларының немкетті әрекетінен қауіпті індет жұқтырдым деген Толқынай Ордабаеваның тән жарасына жан жарасы қосылғандай. Дегенмен, ол Денсаулық сақтау министрлігі мен Жамбыл облыстық денсаулық сақтау басқармасы осындай қитұрқы әрекет етіп отырса да, өзін қолдаушы ақ халатты әріптестері мен қарапайым халықтың қарасы көп екенін көңіліне медет тұтатынын айтты.
Нұрболат ӘЛДИБЕК