ҚХА-ның 30 жылдық мерейтойы аясында Президент Жарлығымен халықтар арасындағы бейбiтшiлiктi, достық пен ынтымақтастықты нығайтуға сiңiрген еңбегi үшiн бір топ азамат мемлекеттік наградамен марапатталды, деп жазады Tarazy ақпарат.
Соның бірі Қазақстан Халқы Ассамблеясында төраға орынбасары қызмет атқарған, ҚР Мәжілісі депутаты, Алматы облысы Мәслихаты депутаты қызметтерін атқарған. Қазір ҚР Сенатыныңдепутаты Зәкіржан Кузиев те осы мемлекеттік марапатқа ие болды.
Мемлекет басшысы бүгінгі жиында былай деді:
«Қазақстан халқы Ассамблеясының 30 жылдығы – егемендік тарихындағы айтулы оқиға. Бұл мерейтой әр азаматтың бақ-берекесін арттыру жолында ұлтымызды ұйыстыратын маңызды белеске айналады деп сенемін. Біз халқымыздың береке-бірлігін нығайтуға үлес қосқан азаматтарымызға әрдайым құрмет көрсетеміз. Отыз жылда жеткен жетістіктеріміз осындай абзал жандардың еселі еңбегінің жемісі екені сөзсіз.
Жұртымыз үшін ең үлкен марапат – елдің тыныштығы. Шын мәнінде, қоғамда татулық болмаса, басқа жұмыстың бәрі бекер болмақ. Береке-бірлігімізді сақтай алмасақ, қастерлі Тәуелсіздігіміздің баянды болуы да екіталай. Еліміздегі тұрақтылықты нығайту үшін Ассамблея мүшелері табанды еңбек етіп келеді. Мен баршаңызға шын жүректен алғыс айтамын. Алдағы уақытта да ел игілігін арттыруға мол үлес қоса бересіздер деп сенемін. Ассамблеяның мерейтойы құтты болсын! Бірлігіміз бекем болсын! Еліміз аман, жұртымыз тыныш болсын! Қастерлі Отанымыз – Қазақстан жасай берсін!»
«Парасат» орденімен:
Кист Виктор Эдуардович
Қазақстан халқы Ассамблеясының ардагері, «Возрождение» Қазақстан немістері бірлестігі» ҚБ төралқасының мүшесі
Кузиев Закиржан Пирмухамедович
Парламент Сенатының депутаты
Мақсилова Бақытжамал Шаханқызы
Қазақстан халқы Ассамблеясының ардагері, Павлодар облысының Аналар кеңесінің төрағасы
Пуссеп Геннадий Николаевич
Қазақстан халқы Ассамблеясының ардагері;
“Парасат” ордені – Қазақстан Республикасының жоғары мемлекеттік наградаларының бірі. Ол ғылым, мәдениет, әдебиет, өнер салаларында елеулі жетістіктерге жеткен, сондай-ақ қоғам мен мемлекетке айрықша қызмет еткен азаматтарға беріледі.
”Парасат” ордені – қоғамның рухани дамуына, мәдениет пен өнердің өркендеуіне, ғылым мен білімге қосқан сүбелі үлесі үшін берілетін мемлекеттік марапат. Бұл орден – ел игілігі жолындағы парасаттылық пен еңбектің биік бағасы.
