Жамбылдықтар ауыз бекіткен азаматтар мен отбасыларға жеткізіп беру арқылы ауызашар ұйымдастырды. Жамбыл облысында қайырымдылық шаралары жалғасын табуда, — деп хабарлайды Tarazy.kz тілшісі.
Рамазанның алғашқы аптасында облыс әкімі Бердібек Сапарбаев Тараз қаласы маңындағы Шөлдала ауылында және Қарасу 5-мөлтек ауданындағы және Төлеби көшесіндегі жатақханаларда тұратын тұрғындарының ішінде ауыз бекіткен 500 адамға ауызашар таратты.
Қазіргі карантин жағдайында барлық санитарлық-эпидемиологиялық шараларды сақтай отырып, әрбір ауыз бекіткен азаматқа арнайы ауызашар мәзірі алдын ала әзірленіп, облыстық «һибатулла Тарази» мешітінің қызметкерлері мен волонтерлар жеткізіп берді – деп хабарлады Қазақстан Мұсылмандары Діни басқармасының Жамбыл облысындағы өкіл имамы, «Һибатулла Тарази» мешітінің бас имамы Бейбіт қажы Мырзагелдиев
Облыстың бас имамының айтуынша, биыл исі мұсылман жұртшылық асыға күткен қасиетті айда тәртіпке бағынып, тарауық намазын үйлерінде оқып, әркім өз отбасында рамазан айында жасалатын амалдарды жасап, бала-шағасының тәрбиесіне, иманы мен амалына, мінез-құлқына көңіл бөліп, қайырымдылық та жасай алады. Сондай-ақ «Һибатулла Тарази» мешіті мен қалалық, аудандық орталық мешіттерінің асханаларына және дәмханаларға ас мәзіріне тапсырыс жасап, ауыз бекіткен жамағаттардың үйлеріне апарып беруге болады.
Бүгінде жанұясымен бірге сыртқа шыға алмай отырған мұқтаж отбасылары мен ауыз бекіткендер үшін ауызашар беру жөніндегі облыс әкімінің бастамасын оның орынбасарлары, маслихат депутаттары мен белгілі кәсіпкерлер қолдап отыр.
Тараз қаласының әкімі Айтқазы Қарабалаев та 200 азаматқа ауызашар таратты. Қала әкімдігінің әлеуметтік бағдарламалар бөлімінен мұқтаж тұрғындардың тізімі алынып, оларға арнайы әзірленген ас таратылды.
Сондай-ақ, облыс әкімі Бердібек Сапарбаевтың тапсырмасымен бүгінде қаланың көптеген аумағында бірқатар құрылыс және тазалық жұмыстары белсенді жүргізіліп жатыр. Қала әкімі сол жұмыстарға атсалысып жүрген азаматтарды ауқаттандыруды да назардан тыс қалдырмады.
24 сәуірде Ораза Айт мерекесі басталды. Осыған байланысты Қасым-Жомарт Тоқаев қазақстандықтарды Ораза Айт мерекесімен құттықтады.
Құрметті отандастар!
Баршаңызды қасиетті Рамазан айының басталуымен шын жүректен құттықтаймын!
Бұл – бүкіл әлемдегі мұсылман қауымы үшін рухани жаңару мен жаңғыру кезеңі.
Рамазан айында әрдайым ырыс пен ынтымақ, ізгілік пен мейірім салтанат құрады. Отыз күн Оразада мұқтаж жандарды қолдап, қайырымдылық көрсету игі дәстүрге айналды.
Өкінішке қарай, биылғы Рамазан айы төтенше жағдай кезеңіне тұспа-тұс келіп отыр. Сондықтан жамағатты Қазақстан мұсылмандары діни басқармасының ұсынымдарын орындауға, індетке қарсы күресте бірлік пен жауапкершілік танытуға шақырамын.
Біз, Қазақстан халқы, қанымызға сіңген қадір-қасиеттің арқасында кез-келген сынақтан абыроймен өтеміз деп сенемін.
Сіздерге зор денсаулық, бақ-береке және толағай табыс тілеймін!