Көктемнің келуімен бірге елге береке, жұртқа жақсылық әкелетін Наурыз мейрамы биыл да ұлттық рух пен ұйымшылдықты ұлықтаған кең ауқымды шараға айналды. Талдықорған қаласында орналасқан Жетісу жерінде «Жол активтері сапасының ұлттық орталығы» РМК Алматы қалалық, Алматы және Жетісу облыстық филиалдарының ұйымдастыруымен мерекелік думан өтті.
Наурыз тойы ұлттық салт-дәстүр мен өнерді дәріптеумен қатар, ұжымдық рухты нығайтқан мазмұнды мерекеге айналды. Талдықорған төрінде өткен шара қала тұрғындары мен қонақтарының көңілін көтеріп, ән мен жырға толы әсерлі сәттер сыйлады.
Салтанатты шараға мекеме басшылығы – бас директор Болатбек Айтбаев, оның орынбасары Асхат Оқасов және кадр бөлімінің басшысы Талғат Олжабаев арнайы қатысып, әріптестеріне ізгі тілектерін жеткізді.
«Біздің мекеме жыл сайын Наурыз мейрамын кең көлемде атап өтуді дәстүрге айналдырған. Батыс, шығыс, оңтүстік және солтүстік өңірлердегі әріптестеріміз бірлесіп, көктемнің шуағына бөленіп, ортақ қуанышпен қауышып тұрады. Биылғы шараны Жетісу өңірі өткізуге ұсыныс білдірді. Табиғаты тамаша, гүлге оранған бұл өлкеде той ұйымдастыру – үлкен мәртебе. Баршаңызды Ұлыстың ұлы күнімен шын жүректен құттықтаймын. Бірлігіміз берік, еңбегіміз өнімді болсын!» – деді Болатбек Айтбаев.
Мерекелік кеш аясында жол сапасын қамтамасыз ететін мамандар арасында ұлттық спорт түрлерінен жарыстар өтті. Арқан тарту, садақ ату, кір тасын көтеру, асық ату, бес тас секілді ойындарда қызметкерлер шеберліктері мен ептіліктерін танытты. Жеңімпаздар мен жүлдегерлер арнайы дипломдармен, естелік сыйлықтармен марапатталды.
Сонымен қатар, ұлттық киімнің ерекше үлгісін ұсынған қызметкерлер де көпшіліктің қошеметіне ие болды. Қазақтың дәстүрлі өнері мен мәдениетін жаңғыртқан бұл шара мекеме ұжымының ауызбіршілігін, ұлттық болмысқа деген құрметін айқындай түсті.
Наурыз мейрамы – тек табиғаттың ғана емес, адам жанын жаңғыртатын ерекше мереке. Ал жолшылар қауымының бұл жолғы мерекесі – елге сапалы жол, нық қадам, жарқын болашақ сыйлауға бағытталған еңбектің бір белесі іспеттес болды.
