«Жол активтері сапасының ұлттық орталығы» Алматы қалалық филиалы Наурызнама 10 күндігіне орай ұлттық спорт күнін атап өтті. Іс-шараның басты мақсаты – ұлттық спорт түрлерін дәріптеу және әріптестер арасында салауатты өмір салтын насихаттау.
Бұл күні мекеме қызметкерлері асық ату бойынша сынға түсіп, мергендіктерін сынады. Дәстүрлі ойын тартысты әрі қызықты өтіп, қатысушылар өзара шеберліктерін көрсетті. Филиал директоры Мәулен Әліпов ұлттық спорттың ұрпақтар сабақтастығын сақтаудағы маңызын атап өтті.
“Наурыз мерекесі аясында әр күнді ерекше мән-мағынамен, өзгеше ықыласпен атап өтудеміз. Мысалы, бүгін “Ұлттық спорт күні” жігіттерді ептілік пен мергендікке баулитын, олардың физикалық төзімділігі сынға түсетін асық атудан бақ сынап жатыр. Осындай шаралардың ұжымдық рухты нығайтуға оң әсер ететіні сөзсіз”, — деді Мәулен Тоқтарбайұлы.
Жарыс қорытындысы бойынша үздік нәтиже көрсеткен қатысушылар бағалы сыйлықтармен марапатталды. Ұлттық спорт күнін мерекелеу мекеме қызметкерлерінің көңілінен шығып, олар алдағы уақытта да осындай шаралардың жалғасын табатынына сенім білдірді.
